Në kohën kur shumë punëtorë kanë humbur vendet e punës si pasojë e pandemisë dhe kur përflitej se mund të ulen pagat në sektorin publik, dy institucionet më të larta të shtetit janë treguar dorëlirë dhe nga arka e shtetit kanë shpërblyer zyrtarët me nga 500-600 euro shtesë krahas shtesave të rregullta që marrin në pagat bazë.
Zëvendësministri në detyrë i Financave, Agim Krasniqi, ka thënë se dy institucionet kryesore në vend, Kuvendi dhe Presidenca e Kosovës krahas pagës së tyre po ndajnë edhe nga një shtesë rreth 500-600 euro për festat e fundvitit.
Krasniqi ka thënë se në Kuvend dhe Presidencë të Kosovës po bëhet “lulëzim ekonomik”.
“Nuk po dije asgjë, unë nuk paskam kuptu e dëgju se në Kosove tani kemi rritje dhe lulëzim ekonomik. Nuk po e kuptoj si dikush ka humbur vendet e punës, si dikush nuk ka marr page fare këtë vit. Dy institucionet kryesore ne vend, Kuvendi i Republikës së Kosovës dhe Presidenca e Kosovës këtë e paskan kuptuar sepse tani për festa të fundvitit po ndajnë krahas pagave te tyre te “ulta” edhe nga një shtesë rreth 500-600 euro”, ka shkruar ai në Facebook.
Më tej, Krasniqi ka ironizuar me ndarjen e këtyre shtesave, duke pyetur nëse do të ndahen para edhe për sektorin privat.
“A mund te pritet qe dhe stafit tjetër publik, sektorit privat dhe qytetareve qe kane paga te “larta” do t’i ndajnë nga 1000 euro”, vijon reagimi i tij.
Theksojmë se gjatë vitit 2020 shumë biznese janë përballur me humbje të mëdha financiare, ku për pasojë shumë punëtor kanë humbur punën. Pandemia COVID-19 ka goditur rëndë ekonominë kosovare.
