Komisioni i Pavarur për Media ka thënë se nuk është në dijeni që në Kosovë janë duke operuar IPTV ilegale, por vetëm ato të licencuarat, që janë nëntë.
“Sipas të dhënave të cilat i posedon aktualisht Komisioni i Pavarur i Mediave (KPM), deri me tani në Kosovë operojnë nëntë subjekte IPTV të licencuara në KPM. Ndërsa nuk posedojmë aktualisht të dhëna për veprimtari të IPTV ilegale”, thuhet në një përgjigje të këtij komisioni për Klan Kosova.
Nga KPM thanë që posa të ketë të dhëna për veprimtari ilegale lidhur me çfarëdo platforme të transmetimit apo shpërndarjes së sinjalit, atëherë ndërmerren të gjitha masat ligjore dhe veprimet e duhura.
Diçka e tillë nuk ndodhi ende, me gjithë që Evropa nuk po rri duarkryq në këtë temë.
Në fillim të muajit, forcat italiane të rendit i prinë një aksioni të madh që u shtri edhe në 10 shtete tjera të Evropës, kundër IPTV-së ilegale.
Pesë mijë e 500 IPTV u mbyllën ndërsa iu konfiskuan asete në vlerë prej më tepër se 10 milionë euro.
Çështja e funksionimit të platformës së shpërndarjes IPTV në Kosovë është e rregulluar me akt nënligjor të KPM-së, respektivisht Rregulloren për Shpërndarjen e Ofruesve të Shërbimeve Mediale Audio dhe Audiovizuele.
Klan Kosova pyeti për këtë çështje edhe te Autoriteti Rregullator i Komunikimeve Elektronike dhe Postare. Nga këtu thanë se përgjegjës për këtë fushë është Komisioni I Pavarur për Medie dhe se ARKEP deri tashti nuk e ka rregulluar përmbajtjen, dhe IPTV nuk figuron ne listën e aktiviteteve, te cilat duhet te notifikohen në këtë autoritet.
“Ne si ARKEP, disa here kemi dhëne ndihmën tone ne trajtimin e çështjes se IPTV, atëherë kur është kërkuar nga institucionet përgjegjëse” thuhet në një përgjigje që i është dhënë Klanit.
