Takimi i radhës në kuadër të nivelit të ekspertëve në dialogun Kosovë-Serbi në Bruksel do të mbahet të enjten me ndërmetësimin e emisarit special të BE-së për dialogun, Mirosllav Lajçak.
Zëdhënësi i Bashkimit Evropian, Peter Stano, ka thënë për klankosova.tv se ky takim ishte paraparë të mbahej në muajin shtator, por ishte shtyrë për shkak të situatës me pandeminë e koronavirusit.
“Takimi tjetër i nivelit të ekspertëve të dialogut të lehtësuar nga BE do të zhvillohet këtë të enjte më 29 tetor në Bruksel. Takimi që fillimisht ishte planifikuar të zhvillohej në fund të shtatorit, ishte shtyrë për shkak të masave parandaluese të karantinës në lidhje me pandeminë e koronavirusit”.
“Kryenegociatorët do të takohen tani për të diskutuar zgjidhjen e çështjeve financiare dhe çështjet e pronës”, ka thënë Stano.
Nga Qeveria e Kosovës kanë thënë me anë të një njoftimi për media se Skender Hyseni, koordinatori shtetëror për dialogun është nisur tashmë për në Bruksel për të marrë pjesë në takimin e nesërm.
“Me ftesë të Emisarit Special të BE-së, Mirosllav Lajçak, delegacioni i Kosovës, i prirë nga Koordinatori Shtetëror Skender Hyseni, ka udhëtuar sot për në Bruksel, ku nesër pritet të zhvillohet takimi i radhës me delegacionin nga Serbia”.
“Temë e diskutimit do të jetë zgjidhja e pretendimeve financiare dhe e çështjeve të pronës midis dy vendeve. Me ndërmjetësimin e emisarit Lajçak, në takimin e nesërm, delegacionet do të vazhdojnë diskutimin e filluar në takimin e kaluar rreth kësaj çështjeje”, thuhet në deklaratën e Qeverisë.
Ehat Miftaraj, nga IKD ka deklaruar për klankosova.tv se delegacioni i Kosovës duhet të ketë kujdes lidhur me temat që do t’i diskutojë në këtë takim.
“Lidhur me temat që do të diskutohen në nivel të ekspertëve, delegacioni i Kosovës duhet të ketë kujdes dhe të jetë i përgatitur në mënyrë që të promovoj kontributin e saj dhe të mbrojë të drejtat lidhur me pronat që ka pasur në ish Jugosllavi, të cilat i ka përfituar Serbia në emër të Kosovës pas shpërbërjes së ish Jugosllavisë”.
“Nëse do të ketë bisedime dhe marrëveshje në këtë pikë mbi bazën e kontributit të çdo njësie federative në ish Jugosllavi, ku Kosova ka pas statusin e barabartë më Republikat e tjera, Kosova do të realizoj të drejtat e saj që i takojnë dhe që i janë mohuar pothuajse qe 25 vite”, ka thënë Miftaraj.
