Tabloidi serb “Informer”, e afërt më partinë e presidentit serb Aleksandër Vuçiq, vazhdon të përdorë term fyes ndaj shqiptarëve, ndonëse ky shtet ka përparuar dukshëm ndaj vendeve të rajonit në proceset integruese drejt BE-së.
Ky medium raporton se si politikanët serb nga radhët e opozitës: Borko Stefanoviq dhe Branko Miljush po marrin pjesë në këtë festival, raporton portali “Front Online”.
Termi “Shiptari” përdoret në Serbi – më së shpeshti në fushatat shpifëse në tabloide.
Përndryshe, forca të shtuara të Policisë janë duke e ruajtur objektin në Beograd, ku ka filluar festivali “Mirëdita, dobar dan!”, i cili publikut ia prezanton skenën kulturore dhe shoqërore të Kosovës.
Festivali mbahet që nga viti 2014 dhe atë e organizon Iniciativa e të rinjve për të drejta të njeriut. Festivali do të zgjasë deri më 24 tetor.
Kundër mbajtjes së këtij festivali janë duke protestuar organizatat djathtiste. Disa qindra njerëz, të udhëhequr nga kryetarja e partisë së djathtë serbe “Zavetnici”, Milica Gjurgjeviq Stamenkovski, janë mbledhur rreth orës 18:00, kur qe paralajmëruar edhe hapja e festivalit.
Megjithatë, kordoni i policisë po qëndron në mes të protestuesve dhe objektit ku po mbahet festivali. Festivali po mbahet në Qendrën për dekontaminim kulturor.
Protestuesit po valëvisin flamurin e Serbisë dhe të partisë “Zavetnici”, po mbajnë pankarta me fotografi të manastireve që gjenden në Kosovë dhe po brohorasin parulla për Kosovën dhe komente fyese ndaj pjesëmarrësve të këtij festivali. /Front Online/
