Eksperti i të Drejtës Kushtetuese, Riza Smaka e ka cilësuar si skandaloze dhe të papranueshme deklaratën e emisarit special të BE-së, Miroslav Lajçak, i cili ka thënë se duhet të ndryshohet Kushtetuta për t’u implementuar Asociacioni i komunave me shumicë serbe në Kosovë.

Në një prononcim për GazetaBlic, Smaka ka thënë se kjo deklaratë duhet hidhet menjëherë poshtë, pasi që sipas tij, e njëjta përbën rrezik për shtetin e Kosovës.

“Kjo deklaratë e Lajçakut është skandaloze, e pamutur dhe unilaterale e dhënë prej pikëpamjes së tij, e cila s’do të duhej të pranohej kurrsesi, sepse Kushtetuta e Republikës së Kosovës, serbëve në Kosovë iu garanton të drejta dhe autorizime që janë të pakrahasueshme me cilindo minoritet në unionin evropian. Ne kemi bërë koncesionin më të madh atëherë kur kemi pranur në total propozimin e ish-presidentit Ahtisari dhe kemi pas inkoporuar atë në Kushtetutën e Kosovës krejtësisht në favorin e serbëve të Kosovës. Pra, padyshim se deklarata e Lajçakut përbën rrezik për shtetin. Deklarata e tij është e papranueshme, e njëasnshme dhe e pamatur”, është shprehur Smaka.

Sipas tij, deklarata e emisarit Special, Miroslav Lajçak, siç ka thënë Smaka, vjen për t’u formuar Asociacioni i Komunave Serbe në Kosovë.“Për ta ndryshuar Kushtetutën, kjo e ka aludimin për të krijuar bazë kushtetutare e ligjore për të formuar një Asociacion me autorizime ekzekutive, që do të ishte tepër e dëmshme, e tillë edhe për vetë sistemin kushtetutar, sistetimin politik dhe atë juridik në Kosovë. Në këtë rast, Kosovën do ta shndërronte në shtet të përbërë dhe joefikas”, ka thënë ai.

Lajçaku, pas takimit me presidentin e Serbisë, Aleksandar Vuçiq ka deklaruar se “Kushtetuta nuk është Bibël”, por duhet të ndryshon nenet e ligjet që t’i hapur rrugë formimit të Asociacionit të Komunave Serbe.

“Është logjike se duhet ndryshuar Kushtetuta dhe nuk tha askush se nuk duhet ndryshuar. Kushtetua nuk është bibël”, është shprehur Lajçak në Serbi, menjëherë pas vizitës dyditore në Kosovë.Ndaj kësaj deklarate kanë reaguar edhe politikanët kosovarë, derisa të njëjtit e kanë cilësuar si të papranueshme.Kryediplomatja Haradinaj-Stubllka e ka akuzuar Lajçakun se po dëshiron ta kthejë idenë e korrigjimit të kufijve me deklaratën për ndryshim të kushtetutës së Kosovës.