Ismet Tara, luftëtarë i Brigadës 124 të UÇK-së është deklaruar për rrjedhën e dokumenteve të Gjykatës Speciale në zyret e OVL-UÇK-së, raporton Front Online.

Ai në Kanal 10 tha se të gjithë kanë të drejtë që të dinë dhe t`i shohin ato dokumente në mënyrë që të kenë njohuri se për çfarë janë duke u akuzuar.

“Nuk kam njohuri të sakta, mirëpo në të dyja rastet edhe nëse këto dokumente rrjedhin nga Gjykata Speciale por edhe nëse rrjedhin nga Gjykatat serbë, nëse ne dimë t`i shfrytëzojmë mirë ato është mirë të dimë se prej nga po vijnë ato deklarata për të cilat ne po akuzohemi”, ka thënë ai.

Sipas tij nuk ka qenë veprim i duhur publikimi i atyre dokumenteve, pasi që sipas Tarës të dhënat në to do të duhej të shfrytëzoheshin nga avokatët mbrojtës të ushtarëve të UÇK-së.

“Nuk është dashur që të bëhet krejt kjo zhurmë në media. Ato kanë qenë të mirëseardhura për ne. Është dashur që të heshtim dhe të mos e bëjmë të madhe dhe publike këtë çështje”, ka thënë Tara. /Front Online