Sot Qeveria në mbledhjen e 220-të të saj miratoi Projektligjin për Byronë Shtetërore për Verifikimin dhe Konfiskimin e Pasurisë së Pajustifikueshme.
Por, për këtë ka adresuar disa kritika Instituti Demokratik i Kosovës, i cili tha se miratimi i këtij projektligji pa kaluar nëpër procesin e konsultimit publik është edhe shkelje ligjore edhe qasje e Qeverisë për jotransparencë.
“Shqyrtimi i tij, që nga drafti i parë i propozuar nga Qeveria në vitin 2021 ishte përcjellë me debate të cilat kanë shpërfaqur mospajtime të shumta lidhur me përmbajtjen e tij nga të gjithë hisedarët, përfshirë Qeverinë, Kuvendin, institucionet e drejtësisë dhe shoqërinë civile. Për këtë projektligj Komisioni i Venecias kishte ofruar dy opinione dhe atë së pari më 20 qershor 2022, ku kishte ngritur ngriti shqetësime lidhur me mungesën e qartësisë së projektligjit sa i përket qëllimeve kryesore të tij dhe domosdoshmërinë e legjislacionit të propozuar. Ndërsa, në opinionin e dytë më 19 dhjetor 2022, Komisioni i Venecias vlerësoi përmirësime të rëndësishme veçanërisht në adresimin e shqetësimeve sa i përket të drejtave të njeriut dhe në qartësimin e aspekteve procedurale”, thotë KDI në reagim.
KDI tregon se pavarësisht që projektligji u miratua për herë të dytë në Kuvend më 9 shkurt 2023, i njëjti u kontestua në Gjykatën Kushtetuese, e cila më 29 korrik 2024 vendosi që katër dispozita të këtij Projektligji t’i shpallë si jokushtetuese dhe bazuar në natyrën dhe rëndësinë e tyre, si dhe në shërbim të parimit të sigurisë juridike, të njëjtin e kishte shpallur si të pavlefshëm në tërësinë e tij.
KDI vlerëson që “miratimi i këtij projektligji nga Qeveria, pa kaluar nëpër procesin e konsultimit publik përveç që përbën shkelje ligjore, tregon për një qasje të gabuar dhe jotransparente të qeverisë”.
“Ne besojmë që transparenca, pjesëmarrja e publikut dhe llogaridhënia në vendimmarrje janë parime thelbësore për të garantuar qeverisje të mirë dhe të hapur dhe mbi të gjitha për të siguruar që projektligjet të bëhen në interes të publikut dhe të jenë më të zbatueshme”.
