Drecun: Serbia ia dha Speciales strukturën e UÇK-së

Lajme

Drecun: Serbia ia dha Speciales strukturën e UÇK-së

FrontOnline

30 Shtator 2020

Milovan Drecun, nga kontaktet që kishte pasur me prokurorë në Gjykatën Speciale, ishte interesuar se në çfarë drejtimi po shkonin hetimet për pjesëtarët e UÇK-së, për t’u siguruar se do të hetoheshin krerët më të lartë të saj dhe për këtë kishte punuar personalisht

Kryetari i Komitetit Parlamentar për Kosovën në Kuvendin e Serbisë, i cili në emër të grupit punues ka përgatitur dosje për Gjykatën Speciale në Hagë, në një intervistë për televizionin serb TV Happy, ka konfirmuar bisedat me njerëz nga Dhomat e Specializuara, të cilët i kishte orientuar se nga duhet të fokusohej puna e tyre.

“Pika e kthesës ka qenë, shumë mirë më kujtohet ajo bisedë, e cila ka qenë pas takimit me grupin punues, kur kam biseduar në mënyrë joformale me njerëz nga Dhomat e Specializuara, kur kam dashur ta shoh se në fakt në cilin drejtim po shkonin hetimet e tyre”.

“Kam filluar me bisedën për zinxhirin e hierarkisë komanduese të UÇK-së. Ata, mund të them, kanë qenë disi të hutuar me gjithë këtë dhe kanë pyetur nëse ka dëshmi se si UÇK-ja terroriste ka qenë e strukturuar, që saktë të dihet zinxhiri komandues, por që këto të mos jenë dëshmi tonat, në kuptimin që ‘ja ne kemi dëgjuar diçka dhe këtë e kemi shënuar’, duke e krijuar hierarkinë e zinxhirit komandues, por që a posedojmë dokumente nga shtabet e organizatës terroriste të UÇK-së, me të cilat do të mund të gjitha këto të vërtetoheshin”, ka thënë Drecun.

Më tutje, ai ka shpjeguar se menjëherë ka filluar punën në takimet e grupit të tij punues.

“E kemi bërë këtë pjesë të punës, i kemi dorëzuar komplet strukturën komanduese të organizatës terroriste të UÇK-së dhe dokumentet që janë pjesë e saj”, ka shpjeguar ai.

Është interesante se Milovan Drecun thotë se kishte kuptuar se Gjykata Speciale do të shkonte me variantin “Ndërmarrje e Përbashkët Kriminale” në aktakuzat për pjesëtarët e UÇK-së, gjë e cila edhe ka ndodhur në aktakuzën e parë të konfirmuar ndaj Sali Mutafës – Calit.

“Kam kuptuar që ata, nga pamundësia, siç janë shprehur, për të bërë procedimin e të gjitha krimeve, sepse ka pasur shumë krime, do të shkojnë në variantin e Ndërmarrjes së Përbashkët Kriminale, gjë që është formuluar në këtë aktakuzën e parë të vërtetuar. Kjo disi ka kaluar pa u vënë re në opinionin publik, por që ky formulim është shumë i rëndësishëm, pra Ndërmarrja e Përbashkët Kriminale ka ekzistuar”, ka thënë ai.

Në emisionin e mëngjesit në televizonin serb TV Happy, dy ditë më parë, Drecun ka treguar se ka pasur kontakte shumë të shpeshta me prokurorë të Gjykatës Speciale dhe që i ka ndihmuar ata me dokumente, ndërsa ka pohuar se ka marrë edhe mirënjohje të veçantë nga ish Kryeprokurori i Dhomave të Specializuara, David Schwendiman.

“Unë që në fazën e parë nga zotëri Schwendiman kam marrë falënderim, madje me dorë e ka shkruar falënderimin e veçantë, gjë që nuk është e zakonshme, sepse qartësisht i kemi ndihmuar shumë, së paku në atë fazën fillestare, që ata të ndajnë drunjtë nga mali, të shohin në cilat drejtime lëvizin”, ka thënë ai.