Protesta kanë shpërthyer në disa pjesë të Indisë të mërkurën pasi autoritetet kanë djegur trupin e viktimës së një përdhunimi një lëvizje që familja e viktimës ka thënë se është bërë pa lejen e saj, raporton agjencia Reuters.
Viktima 19-vjeçare nga komuniteti Dalit – shkalla më e ulët e sistemit të lashtë të klasave në Indi – ishte sulmuar dhe përdhunuar më 14 shtator në një fushë afër shtëpisë së saj në qarkun Hathras, rreth 100 kilometra nga kryeqendra New Delhi, kanë njoftuar autoritetet.
Ajo vdiq në spital të martën nga lëndimet që mori gjatë atij sulmi. Policia ka arrestuar katër burra në lidhje me këtë përdhunim.
Vëllai i viktimës i ka thënë Reutersit se as Policia e as Qeveria nuk ka kërkuar lejen nga familja për të përformuar rituale mortore për viktimën në fshatin e saj në Uttar Pradhes rreth orës 2:00 të mëngjesit të mërkurën.
“Ne i lutëm autoritetet dhe Policinë se duam të mbajmë ceremoninë mortore në mëngjes, por nuk dëgjuan dhe e bënë ceremoninë vet. Ne mbetëm prapa barrikadave që formuan duke përdorur forcat policore. Nuk patëm mundësi të shihnim fytyrën e motrës sonë të vdekur”, ka thënë ai.
Praveen Kumar Laxar, një zyrtar i shërbimit civil, ka mohuar se djegia e kufomës është bërë pa lejen e familjes.
“Me pajtimin e tyre u bë djegia e saj. Anëtarët e familjes ishin aty. Pretendimet janë të gabuara”, thotë Laxar.
Viktima dhe vëllai i saj nuk janë duke u identifikuar për shkak të ligjeve kundër publikimit të identitetit të viktimave të dhunës seksuale.
Ky përdhunim ka shkaktuar zemërim të madh në Indi, ku dhuna ndaj grave dhe klasave të ulëta vazhdon të jetë e lartë. Vëllai i viktimës ka thënë se katër burrat janë anëtar të klasave më të larta në fshat.
Uttar Pradesh, që udhëhiqet nga Partia Bharatiya Janata e kryeministrit Narendra Modi, vlerësohet si vendi më i pasigurt në Indi për gratë.
Protestuesit në qytetin Hathras në Uttar Pradesh janë përleshur me policët sot. Protestuesit mbanin maska për t’u mbrojtur nga koronavirusi.
“Jam këtu për t’i treguar qeverisë së Uttar Pradeshit dhe njerëzve që janë injorant ndaj privilegjeve nëpër klasa dhe nga dhuna bazuar në klasa, se tashmë është mjaft”, ka thënë 26-vjeçarja Shambhavi.
Ajo dhe disa protestuesë tjerë mbanin slogane anti-qeveritare.
Në Kalkutë, protestuesit dogjën fotografinë e Yogi Adityanathit, kryeministrit të Uttar Pradesh.
