Më 4 shtator të këtij viti Kosova dhe Serbia kanë nënshkruar një marrëveshje në Uashington, e që për Lëvizjen Vetëvendosje, e njëjta është firmosur nga një grup jo legjitim dhe jo kompetent.

Nënkryetarja e kësaj partie, Fatmire Kollçaku ka thënë për Front Online, se vetëm Serbia përfiton nga pikat e kësaj  marrëveshje

“Duke qenë se ka shkuar edhe një grup jo legjitim dhe jo kompetent, ne i kemi marrëveshjet që i kemi. Keni qenë dëshmitarë në seancën që e kemi mbajt dhe ne jemi prononcuar për çështjen e Ujmanit. Pastaj minishengeni, përfitimet janë kryekëput për Serbinë dhe në vend se pala kosovare t’i kishte analizuar të gjitha marrëveshjet që nuk janë zbatuar nga Serbia, në fakt deklarohet se jemi duke shkuar drejt një marrëveshje finale dhe njohjes”, ka thënë ajo.

Kollçaku theksoi se se gjasat se Kosova dhe Serbia të arrijnë një marrëveshje finale me njohje reciproke janë zero.

“Ne jemi dëshmitar që Serbia nuk e ka qoftë edhe një ditë ku nuk deklaron se nuk do ta njeh Kosovën, dhe me udhëheqësinë që e ka Serbia, pritshmëritë që të arrijmë deri në një marrëveshje finale apo me njohje janë baraz me zero. Serbia duhet të demokratizohet dhe pa ndërrim pushteti aty nuk mund të kemi pritshmëri që do t’i zbatojnë̈ marrëveshjet. Kosova dhe zyrtarët e shtetit tonë nuk guxojnë të heqin dorë dhe të mos kërkojnë anëtarësimin në organizata të rëndësishme. Ne vetë po qojmë dorë nga shtetësia, përderisa Serbia në asnjë moment nuk po dorëhiqet”, ka thënë ajo për Front Online.