Hashim Thaçi ishte i pari që i hapi rrugë krijimit të Asociacionit të Komunave Serbe në Kosovë.

E bëri këtë kur si kryeministër në 2013 dha nënshkrimin e tij në marrëveshjen e Brukselit, e cila përmbante 15 pika – 6 prej të cilave ekskluzivisht për këtë punë.

Isa Mustafa u bë i dyti kur vendosi ta mbrojë dy vjet me vonë, më 2015,  marrëveshjen që e nënshkroi i pari (Thaçi), shkruan Front Online.

Veçse për ujdinë politike që arriti me Vuçiqin, për themelimin e asociacionit, Mustafa që atë botë ishte kryeqeveritar, pati një kusht.

Së pari ajo do të dërgohej për vlerësim në Gjykatën Kushtetuese të Kosovës.

Institutcioni më i lartë i drejtësisë në vend gjeti 23 shkelje në të, shkruan Front Online.

Ato u përkujdes t`i rinumërojë të martën, pikërisht në 5 vjetorin e nënshkrimit të kësaj marrëveshje, dikush që prej fillimit i kishte kundërshtuar ashpër.

Lideri i Vetëvendosjes, Albin Kurti, përmes një postimi në Facebook, thotë se Zajdenica siç e quan ai, erdhi si pasojë e njerëzve të papërgatitur e pa platformë për Kosovën.

“Kjo e bëri shtetin tonë shumë më tepër temë sesa palë në bisedime. Pa e nxjerrur këtë mësim, vetëm sa përsëriten të këqijat. Me mënyrën e njëjtë nuk ka rezultate tjera”, shkroi Kurti në Facebook.

Nga partia e tij fjalë për asociacionin e komunave serbe, në po të njëjtën ditë  pati edhe Glauk Konjufca, shkruan Front Online.

Ky thotë se kjo çështje është më aktuale sot kur po zhvillohet faza finale e dialogut sesa që ishte kur u nënshkrua.

“Fatkeqësisht në LDK dhe në partitë e PAN-it ka dy llojë të politikanëve, pro Zajednicës dhe pro shkëmbimit të territoreve. Prandaj duhet të ngrehim këtë çështje, pasi është vetëm VV-ja që i refuzon dhe i kundërshton të dyja”, ka thënë Konjufca.

Pikërisht kundërshtimet si këto e mosefikasiteti e ekipit kosovar për hartimin e statutit të asociacionit  e kanë zvarritur procesin.

Megjithatë themelimi i kësaj bashkësie, sipas analistit, Shkodran Ramadani,  vonim mund të ketë, por shpëtim jo.

“Tash me BE-në si udhëheqëse politike të dialogut, sepse e dimë SHBA-ja ka thënë se do të merret me çështje ekonomike,  asociacioni do të shënojë një rikthim në temën e negociatave. Besoj që nëse do të ketë një marrrëveshje, asosacioni pashmangshmerisht do të jetë pjesë e saj. Çështja është vetëm sa kompetenca dhe a do të jetë i nevojshëm ndryshimi i Kushtetutës për akomodimin e një asociacioni të tillë”, u shpreh Ramadani për Front Online.

Në 10 nga 38 komunat kosovare, pakica serbe është shumicë.

Pos për themelimin e asociacionit, Kosova dhe Serbia, në 2015 patën arritur akord edhe për tri marrëveshje tjera, atë për Telekomunikacion, Energji dhe për lirimin për qarkullim të urës mbi lumin Ibër në Mitrovicë./FRONT ONLINE.