Pas përfundimit të seancës konstituive të Kuvendit të Maqedonisë së Veriut, kryetari i LSDM-së Zoran Zaev, ka folur në lidhje me qeverinë e re dhe negociatat me partinë.

Ai tha se që nga dita e sotme do të realizojë takime me të gjithë krerët e partive shqiptare dhe se do ta njoftojë opinionin nëse ka zhvillime ose marrëveshje, njofton Telegrafi Maqedoni.

Zaev u pyet në lidhje me deklaratat e tij parazgjedhore, kur tha se është e shëndetshme për shtetin që BDI të shkojë në opozitë, ndërsa nuk u përgjigj konkretisht nëse akoma e ka këtë mendim.

Ai tha se do të realizojë takime me të gjithë udhëheqësit politik, duke shtuar se qeverinë mund ta bëjnë edhe me BDI-në, por edhe me koalicionin “Aleanca dhe Alternativa”. Megjithatë ai tha se kur do të shkojë në negociata, do të kërkojë që të mos ketë nacionalizëm.

“Ne nuk kemi pasur paragjykime në lidhje emrin e ndonjë kandidati për ndonjë pozicion në vend, por natyrisht, duhet të ketë numra për një kryeministër. Me 15 deputetë, nuk mund të kesh postin e kryeministrit”, tha mes tjerash Zaev.

Ai deklaroi se fillimisht do të takohet me kryetarin e PDSH-së Menduh Thaçi, më pas edhe me udhëheqësit tjerë të partive shqiptare.