Muaji i fundit i vitit 2018 ishte më ndryshe për 15 punonjës së Ministrisë së Punëve të Brendshme.
Ata përfituan nga 100 euro shtesë mbi paga sipas një vendimi të ish-ministrit Ekrem Mustafa të nxjerrë më 28 dhjetor të 2018-s.
Por, ky vendim i ministrit nga radhët e Aleancës Kosova e Re (AKR) dyshohet të jetë në kundërshtim me Ligjin për Pagat e Nëpunësve Civilë, ka gjetur Zyra Kombëtare e Auditimit.
Në auditimin e realizuar për Ministrinë e Punëve të Brendshme, Auditori Gjeneral ka gjetur se vendimi i ministrit Mustafa për t’i shpërblyer 15 punonjës të Ministrisë me nga 100 euro “si mirënjohje për punëtorët e dalluar”, ishte në kundërshtim me rregulloret e këtij institucioni.
Auditori ka vënë në pah faktin se nëpunësit civilë mund të kompensohen financiarisht vetëm në raste të punëve jashtë orarit, gjatë festave, pushimit vjetor apo gjatë lehonisë.
“Përmes këtij vendimi ishin shpërblyer 15 punonjës të shërbimit civil nga kategoria Subvencione dhe Transfere. Kjo ka ndodh për shkak të mos përfilljes së kërkesave ligjore nga menaxhmenti i ministrisë. Kompensimi me para i punonjësve jashtë sistemit të pagave ndikon në rritjen e shpenzimeve të ministrisë dhe shmang pagesën e kontributeve dhe tatimeve të obliguara me ligj”, ka gjetur Auditori i Përgjithshëm.
ZKA-ja, në raportin e publikuar më 22 korrik të 2020-s, ka rekomanduar ministrin që të sigurojë se kompensimet e stafit bëhen vetëm në rastet e parapara me ligjin e pagave dhe të ndërpres praktikat e tilla të shpërblimeve pa bazë ligjore.
“Për më tepër, mjetet nga kategoria e subvencioneve dhe transfereve të ndahen sipas destinimit për të cilin janë alokuar dhe në pajtim me kërkesat ligjore”, thuhet në raportin e Auditorit Gjeneral.
Ekrem Mustafa ishte emëruar ministër i Punëve të Brendshme më 16 tetor të vitit 2018 pas insistimit të gjatë të ish-deputetit të AKR-së, Labinot Tahirit, për emërimin në ekzekutiv të një ministri me prejardhje nga Komuna e Ferizajt.
Këngëtari Tahiri e kishte konfirmuar vetë në fund të vitit 2018 se insistimi i tij tek asokohe kryeministri Ramush Haradinaj dhe kryetari i AKR-së, Behgjet Pacolli, e kishte bërë Mustafën ministër të Punëve të Brendshme. /Insajderi.org
