Kryeministri i Kosovës, Avdullah Hoti, ditë më parë u takua në Bruksel me Presidentin e Serbisë, Aleksandër Vuçiq, në përpjekje për arritjen e një marrëveshje finale ndërmjet të dyja shteteve, raporton portali Front Online.

Por ky takim i Hotit me kreun e Serbisë, u kritikua nga partitë opozitare në Kosovë.

Vazhdimi i dialogut ndërmjet Hotit dhe Vuçiqit në Bruksel nën ndërmjetësimin e BE-së, është parë si dialog teknik.

E, pas kritikave të marra, Kryeministri i Kosovës, Avdullah Hoti, sot përmes një statusi ka  thënë se nuk ka dialog teknik, por vetëm dialog për arritjen e një marrëveshje me njohje reciproke.

Lidhur me këtë, në një prononcim për portalin Front Online, ka folur analisti politik, Ramush Tahiri.

Ai tha se dialogu ndërmjet Kosovës dhe Serbisë për arritjen e një marrëveshje finale deri më tani ka qenë vetëm teknike, ku është biseduar për tema konkrete.

“Dialogu deri tani ndërmjet Kosovës dhe Serbisë me ndërmjetësimin e BE-së ka qenë vetëm teknik, janë zhvilluar për  temat konkrete, sepse BE-ja  si ndërmjetësues por edhe palët janë dakorduar që temat që janë në mes dy shteteve të zgjedhën një nga një dhe i kanë parashtruar diku 36 temat apo marrëveshje duke i përfshirë edhe tri temat e Grenellit që kanë qenë, transporti rrugor,  ajror dhe hekurudhor. BE-ja asnjëherë nuk ka shfaqur interesim që Kosova dhe Serbia  të kenë marrëveshje për normalizim të  marrëdhënieve apo marrëveshje finale”, tha ai për Front Online.

Analisti Tahiri tha se Serbia asnjëherë nuk është pajtuar që në tryezën e bisedimeve të jetë tema e njohjes së Kosovës, por çështjet tjera të cilat janë me interes për Serbinë.

“SHBA-të që nga fillimi  kanë insistuar që Kosova dhe Serbia duhet të kenë njohje reciproke dhe të vendosin marrëveshje gjithëpërfshirës dhe të vendosim marrëdhënie diplomatike, Serbia nuk po pajtohet me pas bisedime për njohjen e Kosovës, por po i bisedon ato që i ka interes temat e ndryshme”, tha ai për Front Online.

Tahiri tha se BE-ja dhe SHBA-ja në raport me dialogun ndërmjet Kosovës dhe Serbisë kanë taktika të ndryshme.

Ai tha se BE-ja ka taktikë që shtetet t’i zgjedhin temat një nga një dhe më pas të arrihet marrëveshja finale, ndërsa SHBA-ja dëshiron marrëveshje finale që më pas Kosova dhe Serbia t’i zgjedhin çështjet e ndryshme si dy shtete sovrane.

“Duket Evropa e ka taktikë që shtetet t’i zgjedhin një nga një temat dhe mandej me konstatuar se marrëdhëniet janë normalizuar dhe me ardhë deri të marrëveshja finale. Kosova dhe SHBA-të po insistojnë që t’i  vendosen marrëdhëniet e njohjes dhe atëherë Kosova dhe Serbia t’i zgjedhin çështjet si dy shtete  sovrane dhe të pavarura, d.m.th. deri tani ka shkuar vetëm teknike”, tha Tahiri për Front Online.

Analisti Tahiri u shpreh optimist se marrëveshja finale ndërmjet Kosovës dhe Serbisë, do të arrihet në fund të viti ashtu siç ka thënë SHBA-ja.

“Unë pres se deri në fund të vitit të bëhet marrëveshja finale dhe të nënshkruhet në Shtëpinë e Bardhë ashtu siç kanë thënë”, u shpreh ai për Front Online.