Familja e Presidentit Hashim Thaçi nëpërmjet një adresimi publik ka falënderuar qytetarët e Kosovës për interesimin që ata kanë treguar pas aktakuzës që i është bërë Presidentit Thaçi nga Prokurori i Specializuar drejtuar Gjykatës Speciale, ku Thaçi bashkë me kreun e PDK-së, Kadri Veselin, akuzohen për 100 vrasje.
Familja e Presidentit Thaçi e mirëpresin këtë solidarizim të qytetarëve, por kërkojnë mirëkuptim nga ta që të mos u vijnë në vizitë për shkak të situatës së krijuar me Covid-19.
Ata thonë se historinë e Kosovës askush s’mund ta rishkruaj e as ta zhbëjë sakrificën e shqiptarëve për liri, pavarësi dhe shtetndërtim.
Njoftimi i plotë:
Të nderuar familjarë, miq dhe bashkëkombës,
Ditët e fundit ka pasur interesim të jashtëzakonshëm të të afërmve të familjes, miqve dhe qytetarëve për të na vizituar në shtëpinë tonë në Burojë, në shenjë solidarizimi për momentet sfiduese nëpër të cilat po kalojmë.
Jemi thellësisht mirënjohës për interesimin tuaj dhe për solidarizimin me ne si familje. Mirëpo, për shkak të pandemisë e kemi të pamundur që t’ju presim në shtëpinë tonë sipas nderit, traditës së familjes dhe të popullit tonë.
Shëndeti juaj është shumë më i rëndësishëm se gjithçka tjetër!
Jemi falënderues përjetësisht për mbështetjen që keni treguar për më tepër se dy dekada për birin, babanë dhe vëllain tonë, presidentin Hashim Thaçi, i cili me gjithë qenien e tij ka punuar për lirinë, pavarësinë dhe shtetndërtimin e Kosovës.
Askush nuk mund ta rishkruajë historinë e Kosovës, e as ta zhbëjë sakrificën e shqiptarëve për liri, pavarësi dhe shtetndërtim.
Lavdi të gjithë dëshmorëve të kombit! Lavdi luftës së Ushtrisë Çlirimtare të Kosovës!
Ju faleminderit nga zemra për mbështetjen e vazhdueshme.
Me respekt,
Familja Thaçi
Burojë
