Sa ishte në krye të ekzekutivit dhe në fillet e pandemisë Covid-19, në Kosovë, ish-kryeministri Albin Kurti, më 12 prill të këtij viti u pati bërë thirrje mërgimtarëve që të japin ndihmë për qytetarët e Kosovës, raporton Front Online.
Menjëherë pas konfirmimit të rasteve të para me Covid-19, Kurti, përmes një video-mesazhi, ka kërkuar nga mërgimtarët që ta ndihmojnë qeverinë me mjete financiare, për ta luftuar pandeminë.
E më 22 maj, ish-kryeministri Albin Kurti, konfirmoi se për pak kohë në thesarin e shtetit, janë mbledhur 720 mijë euro nga mbështetja financiare e diasporës për luftimin e Covid-19.
Në ndëkohë kjo shifër ka lëvizur shumë pak, qysh nga largimi i Kurtit nga ekzekutivi. Në një përgjigje dhënë për Front Online, nga Ministria e Financave është konfirmuar që në Fondin për Covid-19, janë mbledhur 722 mijë e 164 euro.
“Sa i përket gjendjes së të hyrave në Fondin për COVID-19 gjithsej janë 722,164.66 Euro të mbledhura deri më tani, prej të cilave 671,497.36 euro janë të hyra nga jashtë Kosovës”, ka thënë për Front Online, Muharrem Shahini, udhëheqës i Divizionit për Komunikim me Publikun.
Shahini poashtu ka bërë të ditur që kjo llogari është edhe më tutje aktive për këdo që dëshiron të kontribojë, raporton Front Online.
“Llogaria është aktive dhe mund të pranojë fonde në vazhdimësi, ashtu siç vijnë nga donatorët apo edhe kontribuuesit tjerë”, ka thënë ai./Front Online
