Nënkryetari i LDK-së dhe kryetari i Pejës, Gazmend Muhaxheri ka folur për procesin e formimit të Qeverisë Hoti dhe votat kundër të deputetëve të LDK-së.

Muhaxheri në RTV Dukagjini ka thënë se është pritur që Avdullah Hoti të kishte më shumë vota nga deputetët e LDK-së pasi që sipas tij ai ka marrë mbështetje të madhe në Këshillin Drejtues të LDK-së.

“Pothuajse me vota unanime Këshilli i Përgjithshëm e ka nominuar Avdullah Hotin për kryeministër. Është pritur që më shumë deputetë të LDK-së ta votonin në Parlament zotin Hoti”, tha ai.

Kryetari i Pejës thotë se është nga ata zëra që mendon se duhet të ketë qëndrime të ndryshme në parti por sipas tij jo edhe “votime ndryshe nga partia”.

“Nuk ka qenë e lehtë edhe për zotin Hoti për të marrë një përgjegjësi aq të madhe në këto kohë të vështira për vendin”.

Muhaxheri megjithatë thotë se LDK tashmë duhet të përgatitet për zgjedhjet e ardhshme dhe sipas tij gabime të tilla që lidhen me mos votimin e qeverisë duhet të evitohen.

“Nëse tolerojmë sjellje të tilla nuk do të jemi partnerë serioz. Hipotetikisht themi se nëse në zgjedhjet e ardhshme i kemi 25 deputetë e në fakt si kemi”.

Nënkryetari i LDK-së thotë se i vetmi Agim Veliu e largoi nga partia deputetin e vet që nuk e votoi demarkacionin për shkak të një kauze fiktive.

“Askush tjetër [nga degët e LDK-së] nuk mundi të largojë deputetët e vet [që ishin kundër demarkacionit]”

Megjithatë Muhaxheri thotë se personalisht është kundër largimit të Vjosa Osmanit dhe se këtë çështje duhet të ulen dhe ta diskutojnë brenda partisë para zgjedhjeve të ardhshme.