Kryetari i Lidhjes Demokratike e Kosovës, Isa Mustafa ka mbajtur dje takim me kryetares e Degëve të Partisë ku është disktuar për situatën e fundit në vend.

Njëra prej pikave që është trajtuar ishte edhe vota kundër/apstenuese e Vjosa Osmanit, Haxhi Avdylit dhe Fatmir Rexhepit, ndaj Qeverisë Hoti.

Ndonëse në disa media u raportua se kishte kërkesë për largimin e këtyre të fundit nga partia, ndryshe thonë në LDK.

Kryetari i Degës së II në Prishtinë, Florian Dushi tregoi për “Indeksonline” se çfarë u diskutua në takim.

“Natyrisht, unë dhe shumë Kryetar të tjerë jemi shprehur të shqetësuar me faktin e mosrespektimit të vendimeve të organeve të LDK-së, pjesa tjetër është spekullim i burimeve dashakeqe të LDK-së”, ka thënë ai.

Ndërsa, Dushi u shpreh se nuk kishte asnjë propozim për largimin e 3 deputetëve.

“… keni parasysh, ai ka qenë takim me kryetar të degëve ku kryetarët, e përmes tyre degët njoftohen lidhur me zhvillimet e fundit politike, por nuk është ndonjë forum vendimmarrës”, ka deklaruar ai. /