Që nga fillimi i ballafaqimit me pandeminë Covid-19 në Kosovë kanë ndërruar jetë 30 persona. 1047 persona në total janë infektuar me këtë virus, ndërsa 794 janë shëruar.
Edhe pse nuk ka të dhëna të përgjithshme se sa persona kanë vdekur në Klinikat e QKUK-së gjatë kësaj periudhe, zyrtar nga ky institucion shëndetësor, kanë konfirmuar për “Front Online” se vetëm nga Coronavirusi në Klinikën Infektive kanë ndërruar jetë 20 persona.
Të njëjtit sipas tyre kishin edhe komplikime të tjera shëndetësore.
“Ju njoftojmë se në kuadër së Klinikës Infektive, 20 pacientë kanë vdekur nga Covid-19, si pasojë edhe e komplikimeve tjera shëndetësore. Në lidhje me vdekjet e tjera, ato raportohen në kuadër të raporti të rregullt vjetor, në fundvit”, thotë ShSKUK-ja për Front Online.
Ndërsa, sipas Ministrisë së Shëndetësisë 10 personat tjerë që ishin të infektuar me këtë virus, janë nga veriu i Kosovës.
“10 persona e tjerë janë nga veriu i Kosovës. Disa kanë vdekur në Mitrovicë të veriut dhe disa të tjerë në Kragujevc”, kanë thënë për Front Online ,zyrtarë nga Ministria e Shëndetësisë.
Ashtu siç kishte paralajmëruar, nga ShSKUK-ja është thënë se gjatë periudhës tre mujore të pandemisë Covid-19, janë trajtuar vetëm rastet urgjente.
“Në lidhje me rastet jo urgjente, është vepruar konform qarkores së lëshuar nga Ministria e Shëndetësisë, pra është punuar vetëm me raste urgjente, përderisa nuk është punuar në ambulancat specialistike dhe raste jo urgjente. Nuk është konstatuar neglizhencë nga ana e stafit shëndetësor”, thotë ShSKUK-ja për Front Online.
Pas fillimit të masave të ndërmarra nga Qeveria e Kosovës për parandalimin e përhapjes së pandemisë Covid-19 në Kosovë, Shërbimi Spitalor dhe Klinik Universitar i Kosovës (ShSKUK), pati njoftuar për ndërprerjen e përkohshme të punës në ambulanca specialistike, duke pezulluar kështu edhe operacionet dhe procedurat e tjera jo urgjente.
Gjatë këtij tre mujori me ballafaqimin me pandeminë Covid-19, në kuadër të Ministrisë së Shëndetësisë, është formuar një Grup Punues për hartimin e Planit të Veprimit për rikthim të shërbimeve shëndetësore në normalitet.
ShSKUK ka dërguar 5 anëtarë në kuadër të këtij Grupit Punues, teksa nga zyrtarë të QKUK-së është theksuar që ky grup është duke punuar intensivisht për rikthimin e shërbimeve shëndetësore në normalitet. /FrontOnline/
