Manchester United vazhdon të shpresojë se mund ta bindë Arsenalin për të negociuar transferimin e Myles Lewis-Skelly para mbylljes së merkatos verore.

Pavarësisht se 19-vjeçari ka fituar një rol të rëndësishëm në formacionin e Mikel Artetës gjatë javëve të para të sezonit, “Djajtë e Kuq” nuk kanë ndërmend të tërhiqen nga gara.

Carrick kërkon përforcim në krahun e majtë

Sipas “The Sun”, Lewis-Skelly është shndërruar në një prej objektivave kryesore të Michael Carrick për pozitën e mbrojtësit të majtë.

Manchester United po kërkon përforcime në mbrojtje pas një fillimi të vështirë të sezonit në Premier League, ku ndër rezultatet më zhgënjyese ishte humbja 2-0 ndaj Hull Cityt.

Interesimi për talentin e Arsenalit nuk është i ri, por urgjenca është shtuar me afrimin e afatit të fundit të merkatos më 1 shtator.

Drejtuesit e United besojnë se, pavarësisht rolit që Lewis-Skelly ka fituar te Arsenali, mund të ekzistojë ende një mundësi për të hapur negociatat.

Arteta: Jam 100 për qind i bindur se do të qëndrojë

Megjithatë, Mikel Arteta ka qenë shumë i qartë për të ardhmen e lojtarit.

Trajneri spanjoll ka deklaruar se është plotësisht i bindur se Lewis-Skelly do të vazhdojë te Arsenali edhe pas përfundimit të merkatos.

Duke folur për rëndësinë e lojtarëve të dalë nga akademia, Arteta theksoi se lidhja e tyre me klubin ka një vlerë të veçantë.

“Lojtarët që janë rritur në sistemin tonë dhe që e ndiejnë vërtet dashurinë dhe lidhjen me klubin sjellin diçka tjetër. Nuk ka asnjë dyshim për këtë. Duhet të kujdesemi për ta në një mënyrë të veçantë, sepse sjellin një vlerë që është shumë e vështirë të gjendet”, deklaroi Arteta.

E ardhmja e Luke Shaw shton presionin te United

Nevoja e Manchester United për një mbrojtës të majtë është bërë edhe më e madhe për shkak të situatës së Luke Shaw.

Anglezi ka hyrë në sezonin e tij të 13-të me klubin dhe ndodhet në vitin e fundit të kontratës, e cila nuk përmban opsion për zgjatje automatike edhe për një sezon tjetër.

Me të ardhmen afatgjatë të Shaw të paqartë dhe me problemet e vazhdueshme me dëmtimet në skuadër, Carrick kërkon një zgjidhje të re dhe afatgjatë për krahun e majtë të mbrojtjes.

Lewis Hall ishte objektivi i parë

Manchester United kishte identifikuar fillimisht Lewis Hall të Newcastle si një prej objektivave kryesore për këtë pozitë.

Megjithatë, Newcastle ka refuzuar interesimin për lojtarin, veçanërisht pasi gjatë kësaj vere ka lejuar largimin e disa emrave të rëndësishëm.

United ka aktualisht alternativa si Patrick Dorgu, Diogo Dalot dhe Noussair Mazraoui, por asnjëri prej tyre nuk konsiderohet zgjidhja afatgjatë që Carrick kërkon për krahun e majtë.

Versatiliteti i Lewis-Skelly e bën shumë tërheqës

Një nga arsyet kryesore të interesimit të Manchester United është fleksibiliteti taktik i Lewis-Skelly.

Ai fillimisht u dallua si një mesfushor energjik dhe dinamik, por gjatë sezonit 2024/25 u përshtat me sukses në rolin e mbrojtësit të majtë në ekipin e parë.

Pikërisht kjo aftësi për të mbuluar disa pozita e bën atë shumë të vlefshëm për Arsenalin dhe njëkohësisht shumë tërheqës për Carrickun.

Arteta ka theksuar se klubi synon t’i mbrojë dhe zhvillojë talentet e akademisë.

“Kur kemi mundësi, duam t’i mbrojmë sa më shumë këto asete, t’i zhvillojmë dhe t’i bëjmë jashtëzakonisht të rëndësishëm për klubin”, shtoi trajneri i Arsenalit.

Për momentin, Arsenali nuk jep asnjë sinjal se është i gatshëm të ndahet me Lewis-Skelly, por Manchester United vazhdon ta mbajë 19-vjeçarin lart në listën e dëshirave para mbylljes së merkatos.