Kushtet në të cilat ruheshin produktet dhe pajisjet medicinale në Ambulancën e Mjekësisë Familjare në Qendrën e Studentëve në Prishtinë kanë ngritur shqetësime gjatë një kontrolli të Inspektoratit Farmaceutik, raporton portali Front Online.

Kliko këtu për ta shkarkuar të plotë raportin e Inspektoratit Farmaceutik

Raporti i Inspektoratit Farmaceutik per kontrollin e Ambulances se Mjekesise Familjare te Qendra e Studenteve

Një raport zyrtar i Ministrisë së Shëndetësisë, i datës 25 maj 2026, tregon se inspektorët kishin hyrë në këtë institucion më 30 prill 2026 për të verifikuar pikërisht kushtet e ruajtjes së produkteve dhe pajisjeve medicinale. Inspektimi ishte kryer në prani të përgjegjëses së AMF-së, Dr. Miranda Drini Ismajli, raporton portali Front Online.

Kontrolli nuk është kufizuar vetëm te dokumentacioni. Inspektorët kanë verifikuar hapësirat, produktet, pajisjet medicinale dhe mënyrën e ruajtjes së tyre. Sipas raportit, produktet dhe pajisjet medicinale ishin vendosur në rafte metalike. Por problemi është evidentuar te kushtet ambientale. Në hapësirën ku ruheshin produktet dhe pajisjet për terapi ditore ekzistonte klimatizim, por nuk kishte termohigrometër për matjen dhe regjistrimin e temperaturës dhe lagështisë, raporton portali Front Online.

Situata rezultoi edhe më problematike në një hapësirë tjetër, ku mbahej sasia më e madhe, stoku. Aty, sipas Inspektoratit, nuk kishte as klimatizim dhe as termohigrometër. Kjo do të thotë se institucioni nuk kishte mekanizmin bazë për të dëshmuar se temperatura dhe lagështia, dy parametra që mund të ndikojnë drejtpërdrejt në cilësinë e produkteve medicinale, ishin mbajtur brenda kushteve të kërkuara.

Inspektorati e ka formalizuar gjetjen në procesverbalin nr. 0110263 dhe ka kërkuar vendosjen e klimatizimit dhe termohigrometrit në hapësirat përkatëse.

Në konstatimet përfundimtare thuhet shprehimisht se hapësira ku ruheshin produktet dhe pajisjet medicinale nuk posedonte klimatizim dhe termohigrometër.

Rekomandimi ishte që Qendra e Studentëve t’i siguronte këto pajisje dhe kushtet e ruajtjes t’i harmonizonte me Praktikat e Mira Farmaceutike.

Front Online ka siguruar dosjen e plotë të inspektimeve të Inspektoratit Farmaceutik në barnatoret në gjithë Kosovën, për periudhën 1 janar 2025 – 30 qershor 2026, dhe do ta publikojë atë në tërësi – Vazhdimi 64