Me homazhe dhe nderime për dëshmorët, sot në Vushtrri është shënuar 1 shtatori Dita e Dëshmorëve në Komunën e Vushtrrisë.

Drejtues të komunës, të prirë nga nënkryetari Besim Muzaqi dhe familjarë dhe drejtues të shoqatave të dala nga lufta e UÇK-së, kanë bërë homazhe në Varrezat e Dëshmorëve në Stanoc, si dhe në monumentet e dëshmorëve dhe martirëve të rënë në luftën e fundit.

Në ceremoninë e nderimit në varrezat e dëshmorëve ka marrë pjesë edhe komandanti i FSK-së, gjeneral Rrahman Rama.

Nënkryetari Besim Muzaqi deklaroi se përkulen me respektin më të madh para dëshmorëve që janë udhërrëfyes për vazhdimin e amanetit të tyre.

“Historia e kombit shqiptar është histori e dëshmorëve të kombit. Andaj nuk guxojmë për asnjë çast t’i harrojmë as t’ua zbehim idealet, duhet t’i përkujtojmë e vetes t’ia kujtojmë që nuk na duhet gjë jeta nëse amaneti i dëshmoreve nuk plotësohet e jetësohet deri në fund”, tha ai.

Përkujtim për dëshmorët përmes një mesazhi ka bërë edhe kryetari i Komunës, Xhafer Tahiri, i cili për shkak të pandemisë ende është në vetizolim.