Shkollat e mesme në vend të premten në orën 16:00 do të mbyllin konkursin për pranimin e nxënësve në klasë të dhjetë për vitin e ri shkollor 2020/2021. KosovaPress gjatë ditës ka qëndruar në gjimnazin shkencor “Sami Frashëri”, nga ku është vërejtur se për dallim nga ditët e mëparshme fluksi i të interesuarve ishte më i vogël.
Kur kanë mbetur më pak se 2 orë nga përfundimi i këtij afati, drejtori i gjimnazit shkencor “Sami Frashri”, Fetah Zejnullahu, thotë se kanë aplikuar 359 nxënës, derisa theksoi se gjatë regjistrimit nuk kanë hasur në ndonjë ekses.
Ai për KosovaPress ka bërë të ditur se të hënën me 24 gusht, nxënësit do të marrin rezultatet.
“Tash kur po flasim kanë mbetur edhe 2 orë diku dhe afati për aplikim përfundon. Deri më sot sa i përket procedurës nuk kemi pasur ndonjë ekses, përgatitjet të cilat janë bërë mirë ka shkuar procesi, aplikimi është i kënaqur dhe po presime dhe këto dy orë edhe të përfundoj aplikimi. Mandej t’i marrim rezultat dhe të përgatitemi me datën 24 të hënën të publikohen rezultatet e aplikimit…Sa i përket aplikimit do të thotë deri më tani janë 359 aplikues”, thotë ai.
Zejnullahu thotë se pavarësisht situatës së vështirësuar për shkak të pandemisë, kanë arritur që t’i përfundojnë të gjitha procedurat e regjistrimit me kohë.
“Ka qenë e vështirë, mirëpo në bazë të procedurës do të thotë ecuria si ka shkuar deri më sot, unë jam i kënaqur…Me 24 shpallën rezultatet nxënësit vijnë sigurisht janë të njoftuar. Pas datës 24 janë 48 orë kur nxënësit munden me i tërheq dokumentet ku ata të cilët nuk i kanë plotësuar kriteret për shkollën ‘Sami Frashëri’ të kenë mundësi të aplikojnë në shkolla profesionale”, thotë ai.
Sipas të dhënave të MASH në klasët e dhjeta këtë vit shkollor pritet të regjistrohen 26.261 nxënës që kanë përfunduar klasën e nëntë. Rezultatet e të cilëve bëhen të ditura me 24 Gusht.
Pas anulimi të Testit të Arritshmërisë, për shkak të situatës epidemiologjike në vend regjistrimi në klasët e dhjeta këtë vit po bëhet në bazë të notës mesatare që nxënësit kanë treguar nga klasa e 6 deri në të nëntën./kp/
