Së paku 14 persona kanë vdekur dhe 51 të tjerë janë lënduar, pasi një zjarr i madh përfshiu një ndërtesë 13-katëshe në jug të Tajvanit në orët e para të së enjtes.

Zjarri i ashpër shpërtheu rreth orës 3 të mëngjesit sipas kohës lokale dhe u përhap në shumë kate të ndërtesës, thanë zjarrfikësit në qytetin Kaohsiung.

Banorët thanë se dëgjuan një shpërthim të fuqishëm gjatë natës dhe kur u zgjuan, e panë ndërtesën në flakë, shkruan Independent, transmeton Gazeta Express.

Komandanti i zjarrfikësve, Lee Ching-hsiu, tha se të paktën nëntë nga të vdekurit në zjarr nuk kishin shenja jete, kur trupat e tyre u gjetën nga zjarrfikësit.

Shkaktari i zjarrit, që besohet se ka nisur në katin e parë të ndërtesës, ende nuk është konfirmuar. Pritet që numri i viktimave të rritet, sepse shumë njerëz besohet se kanë mbetur të ngujuar në ndërtesë.

Ndërtesa e vjetër 40 vjet shërbente si hapësirë për banim dhe tregti. Në katet e poshtme kishte dyqane, ndërsa në katet e sipërme banesa. Raportohet se mes kateve 7 e 11 ndodhen 120 njësi banimi.