Policia e Kosovës ka shqiptuar fletëparaqitje për kundërvajtje në trafik për një qytetar, i cili ka qarkulluar me mjet motorik (traktor) në autostradën “Ibrahim Rugova”.

Siç bëhet e ditur në njoftimin e policisë, drejtuesi i këtij mjeti nuk posedonte fare patentë-shofer për këtë kategori të mjeteve.

“Njësia për Kontroll të Autostradave pas pranimit të informatës nga qytetarët se në autostradën “Ibrahim Rugova” është duke qarkulluar një  mjet motorik (traktor), i cili sipas Ligjit për rregullat e trafikut rrugor e ka të ndaluar lëvizjen në autostradë, Policia ka marrë masa të shpejta dhe ka arritur të identifikojë dhe të ndalojë drejtuesin e këtij mjeti (traktor) me ç’rast ka rezultuar se drejtuesi nuk posedonte fare patentë shofer për këtë kategori të mjeteve ku i është shqiptuar fletëparaqitje për kundërvajtje në trafik dhe gjithashtu nën përcjelljen e Policisë është larguar nga trafiku”, thuhet në komunikatën për media.

Policia tutje tha se me qëllim të ofrimit të sigurisë për të gjithë pjesëmarrësit në trafik, do të vazhdojë me ndërmarrjen e masave dhe veprimeve policore ndaj kundërvajtësve të ndryshëm, të cilët rrezikojnë sigurinë në trafikun rrugor.