Vetmia është në të njëjtin nivel me pirjen e duhanit dhe obezitetin kur bëhet fjalë për ndikimin e tij në shkurtimin e jetës dhe dalëngadalë po bëhet një problem i shëndetit publik, thonë shkencëtarët.

Studiuesit nga Universiteti Stanford dhe Universiteti Kinez i Hong Kongut kanë dalë me rezultate që tregojnë se efektet negative emocionale të izolimit social shkurtojnë jetën më shumë sesa pirja e duhanit. Ndjenjat e vetmisë, pakënaqësisë dhe mungesës së shpresës janë zbuluar se i shtojnë një vit dhe tetë muaj shtesë moshës së një personi, që është sa pesë muaj më shumë se pirja e duhanit.

Ekspertët besojnë se inflamacioni kronik i trupit, me shumë gjasa i shkaktuar nga një aksident, dëmton qelizat dhe organet vitale, gjë që ndikon në shëndetin tonë dhe, ndër të tjera, edhe sa do të jetojmë.

Çfarë thonë ekspertët?

Laurie Theeke, profesoreshë në Universitetin George Washington, e cila nuk ishte e përfshirë në studimin e përmendur, por ka vite që merret me një temë të ngjashme, tha për Daily Mail se nuk është çudi që vetmia të çon në plakje më të shpejtë sesa pirja e duhanit.

“Unë e kam studiuar këtë që nga viti 2002 dhe ka shumë grupe të dhënash kombëtare që tregojnë se vetmia çon në jetëgjatësi më të shkurtër, vdekshmëri më të lartë dhe më shumë sëmundje shoqëruese, kështu që këto të dhëna nuk më habitin aspak,” tha Laurie, e cila pretendon se njerëzit e vetmuar kanë nivele më të larta të inflamacionit dhe ankthit, dhe gjithashtu janë më pak aktivë, gjë që vetëm më tej kontribuon në një shëndet më të dobët.

Tashmë është vërtetuar se vetmia është e lidhur ngushtë me rritjen e rrezikut të humbjes së kujtesës, pra me shfaqjen e çmendurisë me 40 për qind të pabesueshme, si dhe me zhvillimin e diabetit./FrontOnline/