Lëvizja Vetëvendosje ka paralajmëruar se do ta dërgojë në Gjykatën Kushtetuese presidentin Hashim Thaçi. Ky veprim, sipas tyre, vie pasi që presidenti Thaçi së bashku me ish-kryeministrin Haradinaj e bindën deputetin Haxhi Shala për të votuar pro Qeverisë Hoti.
Shefi i Grupit Parlamentar të kësaj partie, Rexhep Selimi, ka thënë se presidenti ka bërë shkelje kushtetuese që i ndërhyri në votë deputetit Shala.
“Deputeti Shala e shpjegoi mirë rastin. Kjo është shkelje kushtetuese nga Thaçi, prandaj do ta dërgojmë në Gjykatën Kushtetuese këtë akt. Kemi shumë lëndë që do t’i dërgojmë në Kushtetuese. Thaçi as që ka tentuar ta fshehë. Ai ka shkelë Kushtetutën duke shkelë paanshmërinë dhe ka ndërhyrë drejtpërdrejt në vullnetin e deputetit, aq më tepër kur vota e tij ka qenë përcaktuese ”, ka thënë Selimi në Klan Kosova.
Ndërkaq, Selimi kritikoi Haradinajn për ndërhyrjen si kryetar partie duke dhënë se e bëri në mënyrën mesjetare.
Ai gjithashtu tha se nuk e di nëse e kanë kërcënuar apo premtuar diçka Shalës, por për votat e siguruara që e bënë Thaçin president tha se s’janë marrë falas, por janë shpërblyer.
