Pas provës së parë të protestës me afro 500 persona, Lëvizja Vetëvendosje, nesër do ta realizojë provën e dytë e cila vjen me përmasa shumë herë më të mëdha.

Zëdhënësi i VV-së, Arlind Manxhuka, ka thënë për Gazetën Insajderi, se prova e dytë e protestës, apo siç e ka quajtur ai performanca, do të jetë me 3500 deri në 5000 persona.

Ai tha se në vazhdimësi kanë pasur kërkesa e interesim të shumë qytetarëve për të protestuar në lidhje me zhvillimet në vend, ndërsa tha se pasi që prova e parë ka qenë e suksesshme, do të vazhdojnë edhe me të dytë.

“Pas realizimit të suksesshëm të provës së parë nga qytetarë e aktivistë ne kemi menduar të realizojmë testin e dytë por në përmasa më të mëdha. Pra, kjo sigurisht se nuk është një protestë, por një performancë me 3500 deri në 5000 persona”, tha Manxhuka.

Zëdhënësi, Arlind Manxhuka, po ashtu  tha se tashmë kanë dorëzuar njoftimin për provë të organet e rendit.

Ndërkaq sot, kryeministri në detyrë Albin Kurti, njëherësh edhe kryetar i Lëvizjes Vetëvendosje, deklaroi sot se protesta është e drejtë qytetarë, ndërkaq tha se nuk i kanë liruar masat kundër pandemisë, për të realizuar një protestë të tillë.