Të paktën 17 migrantë Bengalë vdiqën pasi i është përmbytur anija pranë Tunizisë ndërsa u përpoqën të kalonin Mesdheun për në Itali nga Libia, ndërsa më shumë se 380 u shpëtuan nga rojet bregdetare, tha organizata humanitare “Gjysmëhëna e Kuqe Tuniziane” të mërkurën.

Anija ishte nisur nga Zuwara, në brigjet veriperëndimore të Libisë, duke transportuar migrantë nga Siria, Egjipti, Sudani, Eritrea, Mali dhe Bangladeshi, tha organizata humanitare.

“17 Bengalë vdiqën dhe më shumë se 380 migrantë të tjerë u shpëtuan në një anije që u nis nga Zuwara e Libisë drejt Evropës,” tha zyrtari i Gjysmëhënës së Kuqe Mongi Slim.

Në muajt e fundit, disa njerëz janë mbytur në brigjet tuniziane, me një rritje të frekuencës së tentimeve të kalimeve në Evropë nga Tunizia dhe Libia drejt Italisë ndërsa moti është përmirësuar.

Qindra mijëra njerëz kanë bërë kalimin e rrezikshëm të Mesdheut në vitet e fundit, shumë prej tyre ikin nga konflikti dhe varfëria në Afrikë dhe Lindjen e Mesme.

Arritjet në Itali, një nga rrugët kryesore të migrantëve në Evropë, kishin rënë në vitet e fundit, por numrat u rritën përsëri në vitin 2021.