Kreu i Kishës Ortodokse Serbe në Mal të Zi shtrohet urgjent në spital për trajtim pas infektimit nga koronavirusi. Ky ishte njoftimi i Kishës ku njoftoi se mitropoliti Amfilohije, 82 vjeç, ndodhet në Qendrën Klinike në Podgoricë.

Ai i kaloi ditët e fundit në izolim në shtëpi, nën mbikëqyrje të vazhdueshme mjekësore, thuhet në njoftimin e Kishës. Mitropoliti Amfilohije thuhet se do të qëndrojë në spital për sa kohë që të zgjasë infeksioni.

Sipas njoftimit, ai ndihet mirë dhe mjekët e vlerësuan situatën e tij si të qëndrueshme. “Iu bëjmë thirrje vëllezërve dhe motrave që të luten plot besim dhe dashuri, si për shërimin e shpejtë të mitropolitit, ashtu edhe për shëndetin dhe përparimin e të gjithë të sëmurëve”, thuhet në deklaratën e Kishës Ortodokse Serbe në Mal të Zi.

Mali i Zi është ndër vendet më të prekura nga koronavirusi në rajonin e Ballkanit Perëndimor. Autoritetet atje kanë konfirmuar mbi 12,500 raste të të infektuarve me koronavirus dhe 188 viktima. Aktualisht rastet aktive aktualisht janë 3,839.