Presidenti amerikan, Donald Trump është parë gjithandej gjatë natës së dytë në Konventën Kombëtare të republikanëve, duke përdorur fuqinë presidenciale për të promovuar fushatën e tij për rizgjedhje.

Tema e natës së dytë ka qenë “Toka e Mundësive”, çka ka ndikuar në tone më pozitive të diskutimit, për dallim nga nata e parë kur në qendër të kritikave kanë qenë ish-nënpresidenti amerikan, Joe Biden, që po garon për president dhe pjesa tjera e demokratëve.

Ndërkohë Zonja e Parë e Shteteve të Bashkuara, Melania Trump, u ka thënë amerikanëve se presidenti “nuk do të ndalet së luftuari për ju dhe familjet tuaja”.

Ajo ka folur edhe për pandeminë e koronavirusit, një pikë e dobët në fushatën e bashkëshortit të saj në fushatën për një mandat të dytë në Shtëpinë e Bardhë.

“Dua ta pranoj faktin se prej muajit mars, jeta jonë ka ndryshuar në mënyrë drastike”, ka thënë ajo.

“Armiku i padukshëm, COVID-19, ka përfshirë shtetin tonë të bukur dhe ka pasur ndikuar te të gjithë ne. Ndjej dhimbje për secilin që ka humbur dikë të dashur”.

“Administrata e burrit tim nuk do të ndalet së luftuari derisa të ketë trajtim efektiv apo vaksinë për secilin”, ka thënë ajo.

“Donald nuk do të pushojë derisa të bëjë gjithçka që mundet për t’u kujdesur për secilin që është prekur nga kjo pandemi e tmerrshme”.

Shtetet e Bashkuara janë një prej territoreve të prekura më së keqi në botë nga koronavirusi, i cili vetëm në SHBA ka lënë të vdekur më shumë se 175,000 persona, ka infektuar të paktën 5.7 milionë amerikanë dhe ka shkatërruar ekonominë.

Në natën e dytë të Konventës Kombëtare, Trump ka shfrytëzuar fuqinë presidenciale, duke e falur një hajn të bankës, i cili tani udhëheq një program në Las Vegas, për t’iu ndihmuar ish të burgosurve që të përfshihen në shoqëri.

Mirëpo ceremonitë e zhvilluara nga Shtëpia e Bardhë janë kritikuar nga demokratët, për shkak të përdorimit të pronës federale për qëllime politike, duke përmendur mundësinë e shkeljes së normave etike.

Sekretari amerikan i Shtetit, Mike Pompeo ka folur nga Jerusalemi, duke lavdëruar politikën e jashtme e Trumpit, Amerika e Para.

“Presidenti Trump ka zbatuar synimin e tij, Amerika e Para”, ka thënë Pompeo teksa është duke zhvilluar vizita në disa shtete të Lindjes së Mesme.

“Kjo mund të mos ketë qenë e famshme në secilin kryqytet të huaj, mirëpo ka funksionuar”.

Mirëpo paraqitja e Pompeos është dënuar nga demokratët pasi kanë konsideruar se ai ka thyer traditën për disa dekada duke u larguar nga shteti gjatë procesit zgjedhor.

Pjesë e Konventës kanë qenë edhe dy fëmijët e Trumpit, Eric dhe Tiffany, që po ashtu kanë foluar nga ndërtesa qeveritare.

Demokratët kanë konsideruar se edhe ata mund të kenë shkelur ligjin.