Armend Thaqi ishte futbollisti kyç i Ballkanit në suksesin historik të Ballkanit përgjatë vitit 2022. Skuadra nga Suhareka arriti të shpallej kampione e Kosovës në vitin që lamë pas, derisa edhe shkroi historinë duke u kualifikuar në fazën e grupeve të Ligës së Konferencës, shkruan FrontOnline.
Në ceremoninë e organizuar nga Federata e Futbollit e Kosovës, “Laureatët e Vitit”, Thaqi e fitoi epitetin e më të mirit në vendin tonë.
Padyshim, futbollisti më i mirë në Kosovë për vitin që lamë pas ishte Armend Thaqi. Mbrojtësi me një bagazh të madh në futbollin e Kosovës ndihmoi Ballkanin ta dominojë Superligën e Kosovës, derisa edhe ta bëjë historinë në garat evropiane.
Për herë të parë pas pranimit të Kosovës në FIFA dhe UEFA, Ballkani u bë skuadra e parë që u kualifikua në fazën e grupeve të një gare madhore evropiane.
Ballkani në krye me Thaqin, ndonëse me më pak përvojë se kundërshtarët e grupit, Sivasspori, Cluji dhe Slavia Praga, arriti të dhurojë paraqitje brilante, derisa Thaqi kishte gjetur tre herë edhe golin.
Përkundër paraqitjeve mbresëlënëse në Superligën e Kosovës si dhe në Ligën e Konferencës, Thaqi kishte edhe një moment aspak të pritur – atë kur për ndeshjet miqësore të Kosovës ndaj Armenisë dhe Ishujve Faroe – nuk u ftua nga përzgjedhësi Alain Giresse.
Në një intervistë për portalin FrontOnline, ish-futbollisti i Gjilanit, Prishtinës e tani Ballkanit është rrëfyer për emocionet e vitit që lamë pas, i cili ishte i suksesshëm si për të, ashtu edhe për skuadrën e tij, Ballkanin.
“Mund të them se deri më tash, ky është viti më i mirë në futboll pasi u shpallëm kampion me shumë meritë dhe e treguam forcën edhe në garat evropiane duke arritur grupet e Ligës së Konferencës”, tha Thaqi duke vazhduar:
“Viti i parë në këtë nivel garash ku morëm pjesë mendoj se ka qenë shumë pozitiv si për skuadrën ashtu edhe në nivelin individual e gjithashtu në aspektin e përfaqësimit të futbollit tonë në Evropë. Në fillim të eliminatoreve nuk e kemi menduar dhe pritur këtë fazë, por në futboll gjithmonë apetiti rritet ndeshje pas ndeshje”.
Si ndeshjen më emocionale, Thaqi e vlerëson atë të parën – ndaj Clujit – në “Fadil Vokrri”, ku edhe e shënoi golin e vetëm në barazimin 1:1.
“Mendoj se ndeshja e parë debutuese kundër Clujit ka qenë emocionale dhe dashti Zoti që unë të shënoj golin debutues që mbetet gjithmonë në kujtesë si një moment i veçantë”, tregoi ai.
Ai thotë se i kanë mbetur peng ndeshjet ndaj Sivassporit dhe Slavias në shtëpi ku nuk kanë fituar.
“Jo vetëm mua, por të gjithëve na ka mbetur peng dy ndeshjet që humbëm brenda – kundër Sivassporit dhe Slavias pasi kishim rastet tona për të luftuar për diçka më shumë”, shtoi ish-futbollisti i Prishtinës për FrontOnline./FrontOnline/