Presidenti i vendit Hashim Thaçi në llogarinë e tij në rrjetin social në Facebook, ka ndërruar fotografinë e “cover”, duke e zëvendësuar me një fotografi të stemës së UÇK-së.

Ky postim i Thaçit vjen vetëm një ditë pas aktakuzës nga Zyra e Prokurorit të Specializuar për krime kundër njerëzimit, shkruan Front Online.

Bashkë me Thaçin, i akuzuari tjetër është edhe kreu i PDK-së, Kadri Veseli.

Sipas njoftimit në faqen zyrtare, më 24 prill 2020, Zyra e Prokurorit të Specializuar u paraqiti Dhomave të Specializuara të Kosovës një aktakuzë me dhjetë pika për shqyrtim prej Gjykatës, ku Hashim Thaçi, Kadri Veseli dhe të tjerë akuzohen për një sërë krimesh kundër njerëzimit dhe krimesh lufte ndër të cilat, vrasje e paligjshme, zhdukje e detyruar e personave, përndjekje dhe tortura.

Thaçi pas kësaj dje kishte lajmëruar emisarin e posaçëm të SHBA-së, Richard Grennell, se e kishte anuluar pjesëmarrjen në takimin e Shtëpisë së Bardhë në Washington që pritej të mbahej më 27 qershor. /FrontOnline/