Rezultatet e fazës së dytë të vaksinave kundër COVID-19 të publikuara në fillim të kësaj jave janë shumë inkurajuese dhe premtuese, sipas një eksperti mjekësor turk.

“Ndërsa studimet e vaksinimit vazhdojnë intensivisht me pritje dhe shpresa të mëdha, rezultatet premtuese të fituara në studimet e fazës së hershme në lidhje me dy studimet u publikuan në revistën prestigjioze shkencore ‘Lancet’”, tha Dr. Atila Taner Kalaycıoğlu për Anadolu Agency (AA).

“Nëse gjithçka shkon mirë në testimin e Fazës III, sikur në Fazën I dhe II, në rastin më të mirë, ne mund të kemi një vaksinë kundër koronavirusit deri në fund të vitit ose në muajt e parë të vitit 2021”, tha ligjëruesi i Fakultetit të Farmacisë në Universitetin Teknik të Karadenizit.

Kalaycıoğlu tha se në mes të pandemisë, studiuesit po punojnë aq shpejt sa të munden të zhvillojnë vaksinën.

“Situata nuk është e pashpresë. Tani masa më e mirë kundër virusit nuk është të ndeshesh me të. Ne kemi armë të fuqishme. Tani ne e dimë virusin dhe sjelljet e tij, por zhvillimi i një vaksine nuk mund të jetë gjithnjë diçka e lehtë”, tha deklaroi ai.

Gjatë pandemisë së gripit të derrave në vitin 2009, zhvillimi i një vaksine zgjati gjashtë muaj përkundër faktit se zhvillimi i vaksinës kundër gripit nuk është i vështirë, tha ai.

Sipas Organizatës Botërore të Shëndetësisë (OBSH), aktualisht, nuk ka vaksinë për parandalimin e koronavirusit. Ekzistojnë 142 vaksina potenciale në vlerësim para-klinik dhe 24 në vlerësim klinik.

Dy studime të vaksinave janë bërë nga Universiteti i Oksfordit me mbështetje nga AstraZeneca, si dhe ndërmarrja kineze e vaksinave CanSino Biologics.

Gjetjet nga Oksford-AstraZeneca treguan se vaksina e adenovirusit është e sigurt dhe shkakton një përgjigje imune për të luftuar COVID-19.

Gjithsej 1.077 persona, të moshës nga 18 deri 55 vjeç, pa histori të infeksionit me koronavirus, u përfshinë në Fazën I dhe II në testet e studimit. Subjektet zhvilluan antitrupa dhe qeliza-T neutralizuese që mund të luftojnë virusin, sipas rezultateve të publikuara në “The Lancet”.

CanSino Biologics përdori një qasje të ngjashme me vektorin e adenovirusit për zhvillimin e vaksinës së saj dhe zbuloi të dhëna që sugjerojnë rezultate të ngjashme në një studim të Fazës II.

“Që të dyja raportojnë raste të pafavorshme lokale dhe sistemike, siç janë ethe, lodhje dhe dhimbje në vendin e injeksionit. Në asnjë testim nuk u raportua për efekte të rënda anësore”, sipas “The Lancet”.

“Në përgjithësi, rezultatet e të dy testeve janë gjerësisht të ngjashme dhe premtuese, pavarësisht nga dallimet në vektor, në vendet gjeografike të popullsive të testuara dhe përdorimin e analizave të neutralizimit”, shtoi revista.

Rezultatet i kanë bindur studiuesit të vazhdojnë në Fazën III, tha Kalaycıoğlu.

“Zhvillimi klinik është një proces trefazor. Gjatë Fazës I, grupe të vogla njerëzish marrin vaksinën testuese. Në Fazën II, studimi klinik zgjerohet dhe vaksina u jepet personave që kanë karakteristika (si mosha dhe shëndeti fizik) të ngjashme me ato për të cilët synohet vaksina e re. Në Fazën III, vaksina u jepet mijëra njerëzve dhe testohen për efikasitet dhe siguri”, sipas Qendrës së SHBA-së për Kontrollin dhe Parandalimin e Sëmundjeve (CDC).

“Shumë vaksina i nënshtrohen Fazës IV zyrtare dhe vazhdimit të mëtejshëm të studimeve pasi vaksina të aprovohet dhe licencohet”, ka thënë CDC.

Për më tepër, Kalaycıoğlu tha: “Në të dyja studimet, platforma e vektorit adenoviral, i cili është një mjet inovativ dhe efektiv i zhvillimit të vaksinave, u përdor për të zhvilluar një vaksinë në mes të pandemisë së COVID-19. Platforma e vektorit adenoviral tërheq vëmendjen e studiuesve për shkak të potencialit të saj për të stimuluar zhvillimin e reagimit imuntar natyror, humoral dhe qelizor”.

“Kjo platformë mori vetëm licencimin rregullator të Komisionit Evropian për vaksinën kundër Ebola më 1 korrik 2020”, shtoi ai.

Të paktën gjashtë muaj mbrojtje

Kalaycıoğlu vlerëson se nëse gjithçka shkon mirë dhe zhvillohet një vaksinë, ajo mund të sigurojë të paktën gjashtë muaj mbrojtje.

Ai tha se ka studime që publikuan të dhëna pozitive mbi provat e vaksinave të mundshme kundër koronavirusit në fazën e hershme, siç është vaksina e mundshme e kompanisë Moderna, “mRNA-1273″.

“Në vendin tonë, studimet për vaksinën kundër koronavirusit kryhen në universitete prestigjioze. Ndoshta një vaksinë e sigurt dhe efektive do të prodhohet në Turqi”, tha ai.

Pas zhvillimit të vaksinës, ajo duhet të shpërndahet në gjithë botën në mënyrë të barabartë dhe të drejtë, kështu që, ndërsa aktualisht punohet për gjetjen e vaksinës, duhet të bëhen përgatitje për prodhimin e sasisë së mjaftueshme të vaksinave që do të dërgohen në botë dhe në vendet që kanë nevojë për të, tha ai.

Që nga shfaqja e parë në Wuhan të Kinës dhjetorin e kaluar, koronavirusi i ri është përhapur në pothuajse në gjithë botën.

Më shumë se 15,7 milionë njerëz janë infektuar globalisht, prej të cilëve 639.000 kanë humbur jetën, ndërsa 8,7 milionë janë shëruar, sipas shifrave të përpiluara nga Universiteti Johns Hopkins me qendër në SHBA. /AA/