Në Qendrën kryesore të mjekësisë familjare në Gjilan janë shtuar rastet e alergjive nga poleni. Kështu ka bërë të ditur specialistja e mjekësisë familjare, Ramize Ahmeti- Ibrahimi.
“Me ardhjen e pranverës ka filluar edhe rritja e telasheve të pacienteve lidhur me alergjitë, duke filluar nga alergjia e polenit, por edhe alergjitë të tjera, siç janë alergjitë në ushqime, alergjitë nga insektet e ndryshme e të tjera. Sa i përket alergjisë së polenit kemi rastin. Aktualisht nuk kemi ndonjë databazë se sa është numri, por frekuentimi i qendrës sonë është mjaft i madh nga këta pacientë”, tha per RTK-ne Ramize Ahmeti – Ibrahimi, specialiste e mjekësisë familjare.
Kollitje, temperaturë, teshtitje dhe skuqje e syve janë disa nga simptomat që thotë se e karakterizojnë këtë alergji. Ajo tregoi edhe për trajtimin dhe grupmoshat më të prekura.
“Të gjitha grupmoshat janë të atakuara, prej fëmijëve të vegjël e deri te rriturit”, shtoi ajo.
Doktoresha këshilloi të gjithë ata që kanë alergji nga poleni ta shmangin ekspozimin në vendet ku ka më shumë lule dhe pemë dhe kujdes më të shtuar.