Ka disa ditë që Kosova përballet me mungesë të energjisë elektrike si pasojë e prodhimit të pamjaftueshëm në termocentralet e vendit.
Kjo ka detyruar KEDS-in të importojë energji elektrike me kosto shumë të lartë, me çmim deri në rreth 350 euro për megavat.
Megjithatë, energjia që prodhohet në hidrocentralin e “Ujmanit” po shitet jashtë vendit me çmim shumë të ulët, bazuar në një kontratë të mëhershme për shitblerje të energjisë elektrike me kompaninë “Future Energy Trading and Exchange Dynamics” sh.p.k, raporton portali “Front Online”.
Sipas dokumenteve të siguruara nga “Front Online”, kompania publike “Ibër Lepenc”, e cila menaxhon me prodhimin e rrymës nga hidrocentrali i “Ujmanit”, në vitin 2020 kishte nënshkruar kontratë një vjeçare për shitje të energjisë elektrike kompanisë “Future Energy Trading and Exchange Dynamics” SH.P.K me nje çmim prej 35.29 € plus TVSH-në. Ky çmim është dhjetëfisht më i lirë se sa çmimi që po e paguan aktualisht Kosova nga importi.
Portali “Front Online” ka mësuar nga burimet e saj se aktualisht prodhimi i energjisë në Kosovë është duke u bazuar nga blloqet e termocentralit “Kosova A” dhe një bllok të Kosovës B, i cili ka hyrë në funksion të enjten në mëngjes, pas prishjes një ditore.
Në mungesë të energjisë së prodhuar nga Kosova B, gjithë Prishtina kishte mbetur pa ngrohje, pasi që ndërmarrja komunale “Termokos” furnizohet me avull për ngrohje nga ky termocentral i KEK-ut.
Portali “Front Online” në lidhje me shitjen e energjisë elektrike jashtë vendit i ka dërguar pyetje gjatë ditës kompanisë publike “Ibër Lepenc” dhe operatorit KESCO, por asnjëri nga ta nuk kanë kthyer përgjigje deri në publikimin e artikullit.
/Front Online/
