Sot në Beograd u shpallë gjendja e jashtëzakonshme për shkak të situatës së përkeqësuar epidemiologjike.

Gjendja e jashtëzakonshme është shpallur në mbledhjen e Shtabit të Krizave të Qytetit.

Zëvendës kryetari i Komunës së Beogradit, Goran Vesiq ka thënë se bëhet fjalë për procedurë standarde në mënyrë që masat të cilat i ka paralajmëruar presidenti i Serbisë mund të zbatohen.

Ai ka sqaruar se duhet të përmbushen disa kushte formale për të zbatuar masat e Shtabit të Krizave të Republikës, dhe e para është që të organizohet një mbledhje e Shtabit të Krizave të Qytetit dhe të shpallet situatë e jashtëzakonshme në territorin e qytetit të Beogradit.

Kur bëhet fjalë për masat, e para është ndalimi i hyrjes në hapësira të mbyllura pa maskë, ku do të duhet të respektohet distanca prej 1.5 metrash, ndërsa të gjithë ata që përdorin transportin publik do të duhet të mbajnë maska, për të cilat do të sigurohen sanksione të caktuara.

Përveç kësaj, do të jetë e ndaluar të mblidhen më shumë se njëqind njerëz në ambiente të mbyllura dhe më shumë se 500 jashtë.

Puna e hotelierëve do të jetë e kufizuar dhe ata nuk do të funksionojnë në mes të orës 23 dhe 6 të mëngjesit.

“Ne do t’i vendosim këto masa për dy javë dhe mendojmë se do të jetë e mjaftueshme për t’u rikthyer në jetën normale pas kësaj. Në çdo rast, nëse ka masa të reja, qytetarët do të informohen me kohë”, ka thënë nënkryetari i komunës.

Të përkujtojmë, Vuçiq mbrëmë ka deklaruar se mbi 82% e të infektuarve me koronavirus janë në Beograd dhe kjo është arsyeja pse janë të nevojshme masat e reja./Insajderi/