Rritja e madhe e rasteve me COVID-19 në Kosovë gjatë ditëve të fundit ka alarmuar ekspertët shëndetësor, të cilët thonë se kulmi i infeksioneve do të arrijë gjatë dy muajve të ardhshëm, raporton portali Front Online.
Kjo rritje e numrit të rasteve ka bërë që të rritet erdhe numri i personave të hospitalizuar në Kliniken Infektive në Prishtinë.
Drejtori i kësaj Klinike, Arben Vishaj, ka deklaruar për FrontOnline se ka rritje të numrit të rasteve, të cilët po kërkojnë trajtim në këtë Klinikë.
Ai tha se aktualisht në Infektivë janë të hospitalizuar 35 pacientë, ku 20 prej tyre po trajtohen me oksigjenoterapi dhe dy pacientë, sipas Vishajt, janë në gjendje të rëndë shëndetësore.
“Kemi një rritje të lehtë të fluksit të pacientëve të shtrirë. Për momentin i kemi diku 35 pacientë të hospitalizuar prej tyre 20 në oksigjenoterapi dhe dy në gjendje të rëndë, ka një rritje të lehtë të fluksit të pacienteve të hospitalizuar”, tha ai për Front Online.
I pyetur se nga pacientët e hospitalizuar, sa janë të infektuar me variantin Delta të virusit, Vishaj tha se ende nuk kanë të dhëna zyrtare, pasi që, sipas tij, analizat e tyre dërgohen jashtë vendit.
“Nuk e kemi këtë të dhënë, kjo varet nga IKSHP-ja, pasi që i çojnë mostrat jashtë shtetit, por nga të dhënat që i ka dhënë IKSHPK-ja ka rezultuar se një përqindje më e madhe e pacienteve të testuar kanë rezultuar me variantin Delta, rrjedhimisht kjo na tregon se është duke dominuar edhe të pacientët tanë ky variant, por ende nuk kemi rezultate zyrtare nga Instituti”, deklaroi ai
Aktualisht në Kosovë, janë 689 raste aktive me COVID-19, ndërsa gjatë 24 orëve të fundit është shënuar vetëm një vdekje. /Front Online/