Prokurorët spanjollë kanë akuzuar yllin e popit Shakira për dështimin për të paguar 6.7 milionë euro tatim mbi të ardhurat e saj në vitin 2018, thanë autoritetet të martën, në akuzat e fundit fiskale të Spanjës kundër këngëtares kolumbiane.
Shakira dyshohet se ka përdorur një kompani offshore për të shmangur pagesën e taksës, thanë prokurorët e Barcelonës në një deklaratë. Ajo është njoftuar për akuzat në Miami, ku jeton aktualisht.
Shakira tashmë do të gjykohet në Barcelonë më 20 nëntor në një çështje të veçantë që varet nga vendi ku ajo ka jetuar mes viteve 2012-14. Në atë rast, prokurorët pretendojnë se ajo nuk ka paguar 14.5 milionë euro tatim.
Prokurorët në Barcelonë kanë pretenduar se fituesja e “Grammy”-t kaloi më shumë se gjysmën e periudhës 2012-14 në Spanjë dhe për këtë arsye duhej të kishte paguar taksat në vend, edhe pse rezidenca e saj zyrtare ishte në Bahamas, shkruan AP.
Zyrtarët spanjollë të taksave hapën çështjen e fundit kundër Shakirës korrikun e kaluar. Pas shqyrtimit të provave të grumbulluara gjatë dy muajve të fundit, prokurorët kanë vendosur të ngrenë akuza.
Firma e marrëdhënieve me publikun që më parë ka trajtuar punët e Shakirës, Llorente y Cuenca, nuk bëri asnjë koment të menjëhershëm.
Korrikun e kaluar, ajo tha se artistja “gjithmonë kishte vepruar në përputhje me ligjin dhe në këshillën e këshilltarëve të saj financiarë”.
Shakira, emri i plotë i së cilës është Shakira Isabel Mebarak Ripoll, ka qenë e lidhur me Spanjën që kur ajo filloi të takohej me futbollistin tashmë në pension Gerard Pique. Çifti, i cili ka dy fëmijë, ka jetuar së bashku në Barcelonë deri vitin e kaluar, kur i dhanë fund lidhjes së tyre 11-vjeçare.
Autoritetet tatimore të Spanjës gjatë dekadës së fundit kanë goditur yjet e futbollit si Lionel Messi dhe Cristiano Ronaldo për mospagimin e plotë të taksave. Këta lojtarë u shpallën fajtorë për evazion fiskal, por shmangën burgun falë një dispozite që lejon një gjyqtar të heqë dënimet nën dy vjet për shkelësit për herë të parë.
