Vala e dytë e koronavirusit në Australi mund të ketë ardhur si pasojë e një skandali seksual. Rojet e sigurisë kanë pranuar se kanë kryer marrëdhënie seksuale me udhëtarë të karantinuar në hotelin ku punonin.
Të dyshuarit me Covid-19 po qëndronin në hotelin me 5 yje “Stamford Plaza” në Melbourne, ku do të qëndronin të izoluar për 14 ditë.
Hetimi nisi pasi 31 raste u konfirmuan me koronavirus në një hotel luksoz në Melbourne dhe rojet pranuan se kishin fjetur disa herë me udhëtarët që qëndronin vetëm në dhomë. Madje, i kishin çuar këta udhëtarë në qendra tregtare.
Tashmë, 300 mijë persona janë izoluar në shtetin e Viktorias në Australi. Vendimi erdhi pas rritjes së rasteve me koronavirus. Për të 17 ditë radhazi janë raportuar rritje të rasteve të reja me koronavirus.
Departamenti Shëndetësor i Viktorias thotë se janë 415 raste aktive dhe 20 pacientë janë të shtruar në spital. Autoritetet kanë kryer deri më 26 mijë teste rutinë.
Ndërkohë, policia ka vendosur dhe pika kontrolli në hyrje-daljet e qytetit të Melburn si pjesë e shtrëngimit të masave kufizuese.
Australia mbahet si një nga vendet që e kanë menaxhuar më së miri pandeminë dhe kthimi i izolimit në shtetin e Viktorias u bë për të shmangur një valë të dytë infeksioni.
