Pas rënies së numrit të rasteve pozitive me Covid19, shtabi emergjent në Komunën e Ferizajt në bashkëpunim me institucionet e nivelit qendror kanë filluar t’i rikthejnë shërbimet e rregullta në repartet e Gjinekologjisë, Kirurgjisë, Pediatrisë e të tjera, të cilat gjatë kohës së pandemisë ishin bartur në QKUK shkaku i mungesës së hapësirës spitalore.
Aktualisht në këtë spital kanë mbetur vetëm 16 pacientë pozitivë me koronavirus, ndërkaq 11 prej tyre me oksigjenoterapi.
Drejtori i këtij spitali, Jeton Zeqiri, ka thënë se aktualisht është një gjendje e qetë dhe relaksuese e rasteve që kërkojnë hospitalizim, po ashtu ka rënë edhe numri i rasteve që kërkojnë trajtim më specifik, andaj, sipas tij, kjo ka qenë njëra ndër arsyet që kanë filluar t’i rikthejnë shërbimet nëpër reparte të tjera.
“Shkaku i zvogëlimit të numrit të rasteve dhe për shkak të lirimit të hapësirave e kemi kthyer fillimisht repartin e Gjinekologjisë me shërbime dhe kemi siguruar që hyrja të jetë e veçantë për nënat shtatzëna që të mos rrezikohen nga infektimet eventuale. Ndërkaq tash jemi në fazën e dytë për lirimin e hapësirës së Kirurgjisë dhe Ortopedisë, dhe besoj se të shtunën më 19 shtator do të fillojmë me trajtimin e pacientëve në këto reparte”, ka thënë Zeqiri.
Sipas tij, aktualisht janë duke e bërë një ngjyrosje dhe dezinfektim të objekteve po ashtu edhe vendosjen e një pjese të inventarit, të cilat janë dëmtuar gjatë periudhës së pandemisë.
“Pra, shumë shpejt këto reparte do të rikthehen në normalitet, ndërkaq kati përdhes, reparti i internos dhe pediatrisë së bashku me emergjencën janë në shërbim të pacientëve me Covid-19”, tha ai. Sipas tij, aktualisht në këtë spital nuk është asnjë pacient në ventilim mekanik, në modulin “Sipap”.
