Deputeti i Grupit Parlamentar të Lidhjes Demokratike të Kosovës, Fatmir Rexhepi, thotë se presidenti i ri duhet të zgjidhet me një konsensus brenda partive politike në vend.

Në një bisedë për Gazeta Blic, Rexhepi thotë se vendit i duhet një president i ri, në mënyrë që mos të viktimizohet më as parlamenti, e as qeveria.“Ky post duhet me i taku të gjithë deputetëve të parlamentit të Kosovës, pra në çoftë se nuk ka marrëveshje politike nga të gjitha subjektet, unë nuk shoh që ka zgjidhje të drejta të mundshme. Me një fjalë duhet të bëhet një konsensus i partive shqiptare prej LVV, LDK, AAK, PDK dhe bashkërisht me e gjet një kandidat konsensual dhe me i dhanë fund kësaj telenovele për president dhe me nda prej institucioneve tjera. Mos me u viktimizu ma as parlamenti as qeveria në lidhje me presidentit”, ka thënë ai.

Ai shton se cila do nga partitë politike që merr postin e presidentit pa konsensus, është punë me hile.

Derisa shton, se të njëjtat e kanë për detyrë sjelljen e stabilitetit politik në vend.“Çdo lider i këtyre partive, nëse pak i ka mbetur me dashtë Kosovën duhet të mendojnë për të sjellë stabilitetin politik. Të gjitha të tjerat mendoj që janë punë me hile, cila do parti që vjen për ata që nuk dojn me marrë vesh për konsensus si sot si nesër, mendoj që nuk e kanë vendimin e drejtë”, deklaron ai.

Javën e ardhshme kryeministri Avdullah Hoti ka paralajmëruar tryezë politikë për postin e presidentit. Ndërsa në AAK dhe PDK janë barikaduar se kandidati për president duhet të jetë nga radhët e tyre. Kurse në Lëvizjen Vetëvendosje thonë se presidenti duhet të zgjedhet, pas zgjedhje të reja.