Vizitat e shpeshta të të dërguarve të SHBA-së e BE-së për dialogun Kosovë-Serbi, është në favor të Kosovës.

Albin Kurti, si kryeministër i Republikës, nuk mund të bëjë asnjë kompromis pa unifikim të brendshëm, ani pse i ka 50+. Prandaj edhe i ka thirrur në takim krerët e opozitës. Mendoj se Kurti duhet t’i takojë edhe liderët që nuk janë në Kuvend, si Nisma, AKR e PSD.

Dialogu nuk është vetëm politikë e jashtme. Opozita duhet t’i shkojë në takim Albin Kurtit, sepse është mirë për Kosovën, por jo edhe për Kurtin si politikan.

Nëse opozita nuk i shkon në takim, Kurti mund t’iu thotë ndërkombëtarëve se nuk e ka mbështetjen e opozitës, prandaj mund të kërkojë kohë dhe ta zgjasë më shumë procesin e dialogut.

Edhe pse Kurti një gjë të tillë nuk do ta bëjë, sikur edhe nuk e ka bërë as në të kaluarën si opozitar. Ka refuzuar pothuajse gjithçka. Opozita duke i shkuar në takim Kurtit, i jep mbështetje dhe presion që ta përfundojë procesin e marrëveshjes Kosovë – Serbi, me trysninë e SHBA-së e BE-së, sepse po e dimë që Serbia nuk ka interes për marrëveshje.

Nëse, Kurti ka ndryshuar standarde të qeverisjes, edhe opozita ka ndryshuar standarde të opozitarizmit.

Opozita duhet t’i japë mbështetje Kurtit, edhe për propozimet e të dërguarit të Posaçëm të Shteteve të Bashkuara të Amerikës për Ballkanin Perëndimor, Gabriel Escobar, që vendimi për targa të shtyhet për 10 muaj.

Opozita në këso raste duhet të mendojë më shumë për interesin nacional, sepse edhe ka përgjegjësi për këtë.

Opozita lë të bëjë politikë për çështje të brendshme, si grevat, ekonomia, arsimi, në të cilat ka shumë ngecje kjo qeveri.

Albin Kurti nuk është negociator i lehtë. Deklarata e Escobarit në publik, kërkon unifikim nga të gjithë, jep të kuptojë që me Kurtin nuk është se po mund të dialogojë.

Me marrëveshje nuk do të mbyllet gjithçka?

Edhe nëse realizohet marrëveshja Kosovë-Serbi, e cila mendoj që ende është shumë larg, Kosova ka shumë çështje të hapura ekonomike e juridike me Serbinë.

Çka nënkupton marrëveshja që po duhet të arrihet, pos asaj politike? Çka do të ndodhë me gjenocidin e Serbisë që e bëri në Kosovë? Pse nuk po përmendet kjo nga ndërkombëtarët e nga vendorët? Opozita le t’ia kërkojë këtë Kurtit?

Opozita po tregon pjekuri politike, edhe pse në takimin e parë që e kërkonte Kurti, isha kundër që ajo të shkojë në takim.

Por, situata ka ndryshuar.

Derisa, e kemi kërkuar angazhimin e SHBA-së në dialog, të mos lejojmë që të zbehet interesimi i saj për ta përmbyllur këtë proces.

(Autorja është producente në ATV)