Nga Hisen Berisha:

Refuzimi i Kryeministrit Kurti ndaj Prokurorisë Speciale dhe institucioneve shtetërore shfaq një problem më të thellë sesa një mosmarrëveshje politike. Kjo sjellje lidhet drejtpërdrejt me një deficit të tij në raport me vlerat themelore të luftës për liri dhe shtetbërjes, qëndrim ky që e ka shoqëruar gjatë gjithë karrierës së tij politike.

Lufta e Ushtrisë Çlirimtare të Kosovës për liri dhe procesi i shtetndërtimit janë dy prej kapitujve më të rëndësishëm të historisë së Kosovës. Fatkeqësisht, qëndrimet dhe veprimet e Kurtit kanë treguar një distancë të dukshme nga këto procese. Mosrespektimi i institucioneve shtetërore nuk është vetëm një refuzim i rregullave kushtetuese, por gjithashtu një mohim i përpjekjeve të gjeneratës që i dha Kosovës lirinë dhe themeloi shtetin.

Ky deficit patriotik nuk vjen nga mosnjohja e historisë, por nga një mungesë e përfshirjes personale në aktet sublime të luftës dhe shtetbërjes. Kjo zbrazëtirë në raport me sakrificat e popullit tonë për liri dhe pavarësi ka çuar në qëndrime që shpesh sfidojnë dhe minojnë këto arritje historike.

Kurti përmanent ka shfaqur një qasje refuzuese ndaj çdo procesi politik që lidhet me arritjet e Kosovës si shtet. Që nga akti i shpalljes së pavarësisë, të cilin e ka cilësuar si të papranueshëm, deri te simbolet shtetërore që ka refuzuar t’i respektojë, ai ka ndjekur një linjë kundërshtimi që buron nga një krizë e thellë në identitetin e tij politik dhe shtetëror.

Kjo krizë e identitetit nuk është thjesht personale, por ka pasoja të drejtpërdrejta për funksionalitetin e shtetit dhe besimin e qytetarëve në institucionet e tyre. Liderët që nuk kanë lidhje të forta me vlerat e lirisë dhe pavarësisë shpesh e shohin shtetin si një pengesë dhe jo si një arritje historike që kërkon përkushtim të vazhdueshëm.

Sundimi i Ligjit është një kusht themelor për shtetndërtim ku parimi i ligjshmërisë përbën bazën e barazisë para ligjit.
Prokuroria Speciale është një institucion kyç në mbrojtjen e rendit kushtetues dhe luftën kundër krimit të organizuar dhe korrupsionit. Respektimi i këtij organi nuk është çështje opsionale, por një detyrim i çdo qytetari dhe, mbi të gjitha, i liderëve të shtetit.
Refuzimi për t’u paraqitur para këtij institucioni dhe tentativat për ta diskredituar atë janë një sulm ndaj shtetit të së drejtës dhe një mesazh i gabuar për qytetarët dhe partnerët ndërkombëtarë.

Deficiti në lidhjen me bëtjen e lirisë dhe shtetin shkaktojë krizë identizeti dhe janë burim i pasojave për Kosovën.
Përvoja tregon se liderët me mungesë lidhjeje me aktet sublime të shtetbërjes shpesh përfundojnë duke sfiduar vetë shtetin. Në vend që të jenë gardianë të institucioneve, ata shndërrohen në kritikë të tyre, duke i paraqitur institucionet si armiq dhe duke i sfiduar për qëllime personale ose politike.

Kurti nuk ka shfaqur ndonjë ndjeshmëri ndaj sakrificave të gjeneratës që çliruan Kosovën dhe ndërtuan themelet e saj shtetërore. Në vend që ta njohë këtë si një bazë mbi të cilën duhet të ndërtojë, ai e ka përdorur refuzimin si mjet politik, duke minuar arritjet e përbashkëta të popullit tonë.

E ardhmja e Kosovës lidhet me nevoja për përgjegjësi dhe patriotizëm kushtetues të drejtuesve të saj.
Në një kohë kur Kosova përballet me sfida të mëdha, përfshirë integrimin euroatlantik dhe ruajtjen e sovranitetit të saj, liderët politikë duhet të jenë shembulli i parë i respektimit të ligjit dhe institucioneve. Mosrespektimi i Prokurorisë Speciale dhe sulmet ndaj saj janë shkelje të parimeve bazë të qeverisjes demokratike dhe dëmtojnë rendin kushtetues të Kosovës.

Respektimi i institucioneve nuk është thjesht një akt ligjor, por një shprehje e patriotizmit kushtetues dhe e përkushtimit ndaj të ardhmes së shtetit. Çdo lider që dështon ta tregojë këtë përkushtim është jo vetëm një dështim personal, por edhe një kërcënim për stabilitetin dhe zhvillimin e Kosovës.

Në këtë drejtim, Prokuroria Speciale duhet të vazhdojë punën e saj të pandikuar, duke siguruar që asnjë person, përfshirë liderët më të lartë, të mos jenë mbi ligjin. Ky është një parim i shenjtë që duhet të mbështetet nga të gjithë ata që besojnë në një Kosovë të drejtë dhe demokratike.