Me dhjetëra mijëra protestues në Bjellorusi u tubuan dhe brohoritën “Urime Ditëlindjen o brejtës” dhe valuan flamujt e opozitës bardh e kuq, afër rezidencës së presidentit Aletksander Lukashenko të dielën, kështu duke vazhduar me presionin që të dorëhiqet udhëheqësi veteran.

Lukashenko, i cili mbushi 66 vjet të dielën, është duke pasur vështirësi t’i përmbajë protestat dhe grevat që nga fitorja e zgjedhjeve të 9 gushtit, për të cilat kundërshtarët e tij thonë se kanë qenë të manipuluara. Ai e mohon këtë gjë dhe thotë se protestat po nxiten nga të huajt, raporton Reuters.

Presidenti rus Vladimir Putin me anë të një telefonate ia uroj ditëlindjen dhe i bëri thirrje Lukashenkos që të vizitojë Moskën, shenjë e përkrahjes së Kremlinit, gjersa Lukashenko po lufton me trazirat dhe kërcënimet e perëndimit me sanksione.

Protestuesit u mblodhën në qendër të kryeqytetit Minsk, me balona, lule dhe flamuj, transmeton KOHA.

Pastaj shkuan afër rezidencës së Lukashenkos, që po ruhet nga forcat e sigurisë qe po mbajnë mburoja, topa të ujit dhe furgonë për të burgosurit. Një kolonë e veturave të blinduara ushtarake po shkonin drejtë qendrës së qytetit, ka raportuar agjencia e lajmeve nga Rusia Interfax, ndërsa janë burgosur së paku 125 persona, sipas Ministrit të Punëve të Brendshme.

Bashkimi Evropian është duke biseduar për vendosjen e sanksioneve mbi Bjellorusinë. Lukashenko, i cili është në zyre qe 26 vjet, kërcënoi të premten se do të ndërpret rrugët tranzite me Evropën si kundërpërgjigje.