Administrata e presidentit Donald Trump po planifikon tërheqjen e një pjese të forcave federale të sigurisë nga Portland në shtetin Oregon, pas javëve të tëra të përleshjeve me protestuesit.
Sekretari i Sigurisë Kombëtare të SHBA-së Chad Wolf tha se tërheqja bëhet më kushtin që policia lokale të mbrojë ndërtesat federale, shkruan BBC.
Portland është shkundur nga 62 ditë të protestave të vazhdueshme.
Sidoqoftë, presidenti Trump deklaroi fitore duke postuar në Twitter se “Nëse Qeveria Federale dhe forcat e saja të mrekullueshme të zbatimit të ligjit nuk do të shkonin në Portland, ky qytet nuk do të ekzistonte më”.
“Do të ishte i djegur dhe i rrënuar për toke. Nëse Majori dhe Guvernatorja nuk do të ndalin krimin dhe dhunën e anarkistëve dhe trazuesve menjëherë, Qeveria Federale do të kthehet dhe do të bëjnë punën që ata ishin dashur ta bëjnë”, shkroi ai, transmeton KOHA.
Disa orë pas lajmërimit për tërheqjen e trupave të mërkurën mbrëma, qindra protestues u mblodhën në qendër të qytetit afër ndërtesës së gjykatës.
Forcat e sigurisë u dërguan në Portland më 4 korrik për të mbrojtur ndërtesat federale të cilat ishin vandalizuar gjatë javëve të tëra të protestave kundër racizmit dhe dhunës policore.
Vendosja e këtyre trupave ndezi edhe me shumë trazira, posaçërisht kur u publikuan xhirime të protestuesve që po rrëmbeheshin nga rrugët nga zyrtarët federalë dhe po futeshin nëpër vetura pa targa.
Guvernatorja e Oregonit Kate Brown dhe Majori i Portland Ted Weeler, që të dy Demokratë, kanë thënë se askush nuk ka kërkuar intervenimin federal, dhe e kanë quajtur si shfaqje force të presidentit Trump për shkak të kampanjës zgjedhore.
