Komisioni për Sëmundje Infektive (KSI) i ka propozuar Qeverisë së Maqedonisë së Veriut masa të reja shtrënguese, sipas të cilëve do të ndalohet puna në restorante pas orës 18:00, ndërsa po ashtu do të jetë i ndaluar grumbullimi në familje gjatë festave të fundvitit. Po ashtu nuk do të lejohen grumbullimet në sheshe e vende pune, njofton Alsati.

KSI-ja i ka rekomanduar Qeverisë pakon e re të masave për periudhën nga 18 dhjetori deri më 21 janar.

“Rekomandimet për masa restriktive janë në drejtim të riorganizimit të orarit të punës për objektet hotelierike, rekomandime për grumbullimet publike, rekomandime për bashkësitë fetare, organizatat e ndryshëm të punës dhe rekomandime që kanë të bëjnë me punën e restoranteve në objektet hotelierike”, deklaroi ministri i shëndetësisë Venko Filipçe.

Rekomandimi do të jetë që objektet që hyjnë në kuadër të gastronomisë të mbyllen në ora 18:00 në vend të orës 21:00, siç ishte deri tani.

Në seancën e sotme të KSI-së prezentë ishin edhe përfaqësuesit e Odës së pavarur hotelierike të cilët shprehën mospajtimet e tyre me pakon e re të masave shtrënguese të cilat kanë të bëjnë me riorganizimin e orarit të punës me objektet hotelierike dhe dorëzuan deri tek Komisioni propozime të tyre.