Ish-kryetari i Komitetit Ushtarak të NATO-s, Petr Pavel, tashmë president i zgjedhur i Republikës së Çekisë në balotazhin e zhvilluar ditën e sotme (28 janar, 2023) me Andrej Babish, kishte mbështetur formimin e Ushtrisë së Kosovës.

Derisa po mbahej në Tiranë mbledhja e Komitetit Ushtarak të NATO-s, gjatë një në një konferencë për mediet, Pavel pati thënë se krijimi i ushtrisë së Kosovës është një e drejtë e vendit por duhet të bëhet në përputhje me Kushtetutën dhe ligjet në fuqi, raporton Klankosova.tv.

“Për krijimin e Forcës së Armatosur të Kosovës ende nuk ka një marrëveshje mes Serbisë dhe Kosovës. Krijimi i ushtrisë duhet bërë në përputhje me Kushtetutën dhe ligjet e Kosovës dhe ky është një ndër rekomandimet që ka bërë dhe Sekretari i Përgjithshëm. Ne nuk po themi që Kosova nuk ka të drejtë të ketë ushtrinë e saj por duhet bërë në përputhje me afatet dhe detyrimet kushtetuese”, pati thënë Pavel.