Presidenti i SHBA-ve Joe Biden tha të mërkurën se ishte një “pasdite shumë e mirë” pasi ai zyrtarisht njoftoi marrëveshjen midis Izraelit dhe Hamasit, shkruan A2 CNN.
Sipas mediave të huaja, reagimi i Biden erdhi menjëherë pas marrëveshjes së përkohshme për të ndalur luftimet në Gaza dhe lirimin me faza të pengjeve dhe të burgosurve palestinezë.
“Është një pasdite shumë e mirë, sepse më në fund mund të shpall se një armëpushim dhe një marrëveshje pengjesh është arritur midis Izraelit dhe Hamasit, pas më shumë se 15 muajsh konflikti që filloi me masakrën brutale të Hezbollahut më 7 tetor,” tha Biden, duke deklaruar gabim cili grup nisi sulmin e 7 tetorit 2023.
“Më shumë se 15 muaj terror për pengjet, familjet e tyre, popullin izraelit. Më shumë se 15 muaj vuajtje për popullin e pafajshëm të Gazës. Luftimet në Gaza do të ndalen. Dhe së shpejti pengjet do të kthehen në shtëpi te familjet e tyre”, shtoi ai, shkruan A2 CNN.
Deklaratat e Biden në Shtëpinë e Bardhë, të shoqëruara nga Zëvendës Presidentja Kamala Harris dhe Sekretari i Shtetit, Antony Blinken, filluan ndërsa kryeministri i Katarit po konfirmonte se ishte arritur një marrëveshje. (A2 Televizion)
