Policia e Kosovës ka arrestuar një person të kërkuar nga INTERPOL-i përmes një urdhërarresti ndërkombëtar të lëshuar nga autoritetet e Maqedonisë së Veriut.
Arrestimi i të dyshuarit me inicialet N.R., i cili ka shtetësi të Kosovës dhe Maqedonisë së Veriut, u realizua më 24 gusht, rreth orës 21:00, nga Drejtoria për Bashkëpunim Ndërkombëtar Policor, në bashkëpunim me njësitë e tjera policore dhe Stacionin Policor në Ferizaj.
Ai kërkohej për veprën penale “vjedhje e rëndë”, pasi i ishte shmangur drejtësisë.
Me urdhër të prokurorit kujdestar, N.R. është dërguar në ndalim policor për 48 orë. Policia ka bërë të ditur se ndaj tij do të vazhdojnë procedurat e mëtejshme ligjore.
